برطانوی سرمایہ کاروں کو سی پیک میں سرمایہ کاری کی دعوت!

برطانوی سرمایہ کار سی پیک میں سرمایہ کاری کریں: میاں طارق مصباح

برٹش ڈپٹی ڈائریکٹر برائے ٹریڈ اولیویا کیمپبل نے کہا ہے کہ برطانیہ پاکستان کے زراعت، قابل تجدید توانائی، گرین انفراسٹرکچر اور تعلیم کے شعبوں میں سرمایہ کاری کرے گا۔ وہ لاہور چیمبر کے صدر میاں طارق مصباح اور نائب صدر طاہر منظور چودھری سے لاہور چیمبر میں ملاقات کے موقع پر اظہار خیال کررہی تھیں۔ سابق ایگزیکٹو کمیٹی رکن رحمن عزیز چن بھی اس موقع پر موجود تھے۔ اولیویا کیمپبل نے کہا کہ پاکستان ایک ابھرتی ہوئی مارکیٹ ہے اور برطانوی تاجر پاکستانی تاجروں کے ساتھ تعلقات مزید مستحکم کرنے کے خواہشمند ہیں۔ انہوں نے کہا کہ دونوں ممالک کے درمیان تاریخی اور دوستانہ تعلقات ہیں، پاکستان میں پہلے ہی برطانوی کمپنیوں کی موجودگی بہترین دوطرفہ تعلقات کا ثبوت ہے۔ لاہور چیمبر کے صدرمیاں طارق مصباح نے برطانوی سرمایہ کاروں کو سی پیک اور گوادر میں سرمایہ کاری کی دعوت دیتے ہوئے کہا کہ اس سے وہ وسیع پیمانے پر فائدہ حاصل کرسکتے ہیں۔ انہوں نے کہا کہ پاکستان کی تاجر برادری برطانیہ سے اچھے تعلقات کو بہت اہمیت دیتی ہے، برطانوی ہائی کمیشن اس سلسلے میں بہت عمدہ کردار ادا کررہا ہے۔ لاہور چیمبر کے صدر نے کہا کہ برطانیہ پاکستان کے بٹے تجارتی حصہ داروں میں سے ہے، گوکہ تجارت میں کچھ کمی کا رحجان ہے مگر توقع ہے کہ بریگزٹ کے ساتھ یہ رحجان بہتر ہوگا۔ انہوں نے کہا کہ پاکستان کے فاریماسیوٹیکل، لیدر، آلات جراحی، زراعت، انفارمیشن ٹیکنالوجی اور ویلیوایڈڈ ٹیکسٹائل کے شعبو ںمیں برطانوی سرمایہ کاروں کے لیے بہت سے مواقع ہیں۔
شعبہ اطلاعات