ایک طرف کرونا وائرس کی تباہیاں تودوسری طرف ایران کا اپنا پہلا فوجی سیٹیلائٹ لانچ کرنا ، کسی خطرے کا پیش خیمہ تو نہیں؟

تہران :ایک طرف کرونا وائرس کی تباہیاں تودوسری طرف ایران کا اپنا پہلا فوجی سیٹیلائٹ لانچ کرنا ، کسی خطرے کا پیش خیمہ تو نہیں ،اطلاعات کے مطابق ایران کی پاسدارنِ انقلاب نے کہا ہے کہ انہوں نے کامیابی سے ملک کا پہلا فوجی سیٹیلائٹ لانچ کردیا ہے۔پاسدارنِ انقلاب نے غیر متوقع سیٹیلائٹ لانچ کو ایک ’عظیم کامیابی‘ قرار دیا۔

امریکا کی جانب سے ایران پر الزام عائد کیا جاتا ہے کہ اس کا سیٹیلائٹ پروگرام میزائل بنانے کے لیے ایک کور ہےجبکہ ایران کا موقف ہے کہ اس کی خلائی سرگرمیاں بین الاقوامی ذمہ داریوں کے مطابق ہیں۔فرانسیسی خبررساں ادارے کی رپورٹ کے مطابق دونوں حریف ممالک کے مابین کشیدگی میں گزشتہ ہفتے اضافہ ہوا تھا جب امریکی اسٹیٹ ڈپارٹمنٹ نے الزام عائد کیا تھا کہ ایرانی بحری جہاز خلیج میں اس کے جہاز کو ہراساں کررہا ہے۔

پاسدارانِ انقلاب کی نیوز ویب سائٹ سپاہ کے مطابق پاسدارانِ انقلاب کا کہنا تھا کہ ’اسلامی پاسدارانِ انقلاب کی جانب سے سلامی جمہوریہ ایران کی پہلی سیٹیلائٹ کامیابی سے خلا میں لانچ کردی گئی ہے‘۔ان کا مزید کہنا تھا کہ نور نامی سیٹیلائٹ کو ایران کی مرکزی سطح مرتفع کے وسیع علاقے میں مرکزی صحرا سے 2 اسٹیج کے لانچر قاصد کے ذریعے لانچ کیا گیا اور سیٹیلائٹ زمین کے 425 کلومیٹر مدار پر ہے۔

واضح رہے کہ اس سے تقریباً 2 ماہ قبل ایران نے ایک سیٹیلائٹ لانچ کی تھی لیکن اسے مدار تک پہنچانے میں ناکام رہا تھا اور اس کے بارے میں کہا گیا تھا کہ فوجی مقصد کے لیے نہیں تھی۔رواں برس 9 فروری کو ایران نے پاسدارانِ انقلاب کی 41ویں سالگرہ سے چند روز قبل ظفر نامی سیٹیلائٹ لانچ کرنے کی کوشش کی تھی۔ایک دوسرے کے دشمن ملک امریکا اور ایران گزشتہ برس 2 مرتبہ مکمل محاذ آرائی کے دہانے پر پہنچے تھے۔