ایران پر اسلحہ کی پابندی ختم ہوگئی تو خطے کے تنازعات میں شدت آ جائے گی، امریکی ایلچی

ایران پر اسلحہ کی پابندی ختم ہو گئی تو خطے کے تنازعات میں شدت آ جائے گی، امریکی ایلچی

باغی ٹی وی :امریکا کے خصوصی ایلچی برائن ہُک نے خبردار کیا ہے کہ اگر ایران پر عاید اسلحہ کی پابندی ختم ہو جاتی ہے تو اس کے بعد شام اور دوسرے ملکوں میں جاری تنازعات میں شدت آئے گی۔

انھوں نے اتوار کو ایک بیان میں کہا ہے کہ ایران پراسلحہ کی تجارت پر عاید پابندی کی میعاد ختم ہوجاتی ہے اور اس میں توسیع نہیں کی جاتی ہے تو اس سے مشرقِ اوسط میں امن وسلامتی کو شدید نقصان پہنچے گا۔

امریکا گذشتہ کئی ماہ سے عالمی برادری سے یہ مطالبہ کررہا ہے کہ وہ ایران پر روایتی ہتھیاروں کی خرید و فروخت پر عاید اقوام متحدہ کی پابندی میں توسیع کی حمایت کرے۔ یہ پابندی اس سال اکتوبر میں ختم ہورہی ہے۔

امریکی وزیر مائیک پومپیو ایک سے زیادہ مرتبہ یہ کہہ چکے ہیں کہ ’’ دنیا میں دہشت گردی کو اسپانسر کرنے والے اور یہود مخالفت میں پیش پیش صف اوّل کے ملک کو روایتی ہتھیار خرید یا فروخت کرنے کی اجازت نہیں ہونی چاہیے۔‘‘