عراق میں امریکی فوجی کانوائے پر پھر حملہ ہوگیا
باغی ٹی وی :امریکی کانوائے اب حملوں کی زد میں ہیں. عراق میں امریکی فوج کے ایک لیجسٹک کارواں کو حملے کا نشانہ بنایا گیا ہے . جب وہ دارالحکومت بغداد سے گذر رہا تھا۔ اس حملے کی ذمہ داری کتیبة السابقون عسکری گروہ نے قبول کی ہے ۔
عراقی چینل صابرین نے ابھی تک اس واقعے کی تفصیلات اور اس میں ہونے والے جانی نقصانات کی تفصیلات کے بارے میں آگاہ نہیں کیا ۔ عراق میں موجود امریکی فوج کے اڈوں اور کاروانوں کو گزشتہ مہینوں میں کئی بار حملوں کا نشانہ بنایا جا چکا ہے۔
عراقی عوام، اپنے ملک سے دہشتگرد امریکی فوجیوں کے باہر نکلنے کا مطالبہ کررہے ہیں اور اس ملک کی پارلیمنٹ بھی اس حوالے سے ایک بل منظور کر چکی ہے ۔ اس سے قبل بغداد کے شمال میں واقع شہر بلد میں ایک فوجی اڈے پر 4 راکٹ داغے گئے تھے جس کے نتیجے میں ایک شخص کے زخمی ہوا تھا .
رپورٹس کے مطابق اس فوجی اڈے میں امریکی ڈیفنس کمپنی کے اہلکار اور کنٹریکٹر رہائش پذیر ہیں تاہم یہ راکٹ حملے کس کی جانب سے کیے گئے ہیں اس حوالے سے اب تک کوئی معلومات سامنے نہیں آئی ہیں۔
خیال رہے چند روز قبل عراق کے شمالی علاقے کردستان کے علاقائی دارالحکومت اربیل میں امریکی ایئربیس پر درجنوں راکٹ داغے گئے تھے جس کے نتیجے میں ایک امریکی کنٹریکٹر سمیت 9 افراد افراد زخمی ہوئے تھے۔
واضح رہے کہ عراق میں مسلح گروپوں اور ملیشیاؤں کی جانب سے امریکی اتحادی افواج سمیت امریکی تنصیبات کو درجنوں بار راکٹ حملوں سے نشانہ بنایا گیا ہے۔
