وفاقی دارالحکومت اسلام آباد میں ڈبل سواری پر پابندی لگادی گئی ہے.
اسلام آباد انتظامیہ کی جانب سے 9 اور 10 محرم الحرام کو ڈبل سواری پر پابندی عائد کی گئی ہے.
اس حوالے سے ڈپٹی کمشنر نے کہا کہ اسلام آباد میں 9 اور 10 محرم الحرام تک دفعہ 144 بھی نافذ رہے گی ، اس دوران شہریوں سے تعاون کی اپیل کرتے ہیں تاہم خلاف ورزی کی صورت میں ان کے خلاف کارروائی عمل میں لائی جائے گی۔
ڈپٹی کمشنر عرفان نواز میمن نے کہا ہے کہ محرم الحرام میں سیکیورٹی کے حوالے سے اسلام آباد انتظامیہ الرٹ ہے، منعقدہ مجالس کی سیکیورٹی کے لئے جامع پلان مرتب کیا گیا تھا جس پر عملدرآمد کیا جا رہا ہے، مجالس انتظامیہ کی طرف سے جاری کردہ پلان کے مطابق اسلام آباد میں 965مجالس منعقد ہوں گی۔
https://twitter.com/dcislamabad/status/1555791167270305793
ڈی سی نے کہا کہ ایڈیشنل ڈپٹی کمشنر، ایس ایس پی آپریشنز، ایس ایس پی ٹریفک، اسسٹنٹ کمشنرز اور مجسٹریٹس تمام مجالس کی نگرانی کر رہے ہیں۔
ڈی سی نے کہا کہ عوام کی جان و مال کی حفاظت کے لئے پولیس اور دیگر سیکیورٹی اہلکار بھی اپنی ڈیوٹی سرانجام دے رہے ہیں، مجالس انتظامیہ کو ہدایات ہیں کہ تمام مجلسیں متعین کردہ اوقات پر اختتام پذیر ہوں، اشتعال انگیزی پھیلانے اورقانون ہاتھ میں لینے والوں کے خلاف سخت ایکشن لیا جائے گا۔ ادھر حکومت نے محرم الحرام کے دوران پاک فوج تعینات کرنے کا فیصلہ کیا ہے.
وزارت داخلہ کے مطابق فیصلہ چاروں صوبوں کی درخواست پر کیا گیا، وزارت داخلہ نے فوج کی تعیناتی سے متعلق نوٹیفیکشین جاری کر دیا، نوٹیفیکیشن کے مطابق پاک فوج سول آرمڈ فورسز کے ہمراہ مل کر کام کرے گی، پنجاب ،سندھ، کے پی کے، بلوچستان، جی بی ، آزاد کشمیر میں فوج تعینات رہے گی۔
بتایا گیا ہے کہ فوج کو آرٹیکل 245 کے تحت تعینات کیا گیا۔اسلام آباد میں بھی فوج تعینات رہے گی، محکمہ داخلہ پنجاب نے نویں اور دسویں محرم الحرام پر امن و امان برقرار رکھنے کے لئے فوج اور رینجرز کے دستے طلب کیے تھے.
پنجاب حکومت نے مذکورہ دونوں ایام میں ماتمی جلوسوں کی مانیٹرنگ کے لئے چار ہیلی کاپٹر کی فراہمی کا بھی مطالبہ کیا تھا۔
