اسلام آباد سے مری مفت بس سروس کا آج آخری دن

اسلام آباد سے مری مفت بس سروس کا آغاز عید کے پہلے روز سے کیا گیا شہریوں نے بڑی تعداد میں مری کا رخ کیا، اب تک ہزاروں مسافر سیر و تفریح کے لیے مری جا چکے ہیں، فری شٹل بس سروس کا آج آخری دن ہے۔

عید کی چھٹیوں میں بل کھاتے راستے، سر سبز پہاڑوں کے دامن میں خوبصورت اور دلکش وادیاں دیکھنے کے شوقین حضرات نے مری کا رخ کیا، لیکن اس بار پنجاب حکومت نے شہریوں کو یہ تفریح مفت فراہم کی ہے، بھارہ کہو سے مری لوئر ٹوپہ تک عید کے تین دن فری شٹل سروس نے سیاحوں کی عید کا مزہ دوبالا کر دیا ہے۔
مری کی سیر کے لیے پنجاب حکومت نے 45 بسیں فراہم کی ہیں، شہریوں کا کہنا ہے کہ بغیر کرائے کے فیملی کے ساتھ عید پر مری جاکر تفریح کرنے کا موقع مل جائے تو اور کیا چاہیے۔
 آج عید کے تیسرے روز فری بس سروس کی سہولت صبح 8 بجے سے رات 8 بجے تک جاری رہے گی۔
ٹریفک کے رش میں پھنسنے کا جھنجھٹ نہ کرائے کی فکر، شہری شٹل بس سروس کو ٹورزم کے فروغ کے لیے قابل ستائش قرار دے رہے ہیں۔