داعش شام اورعراق میں دوبارہ سر اٹھا رہی ہے، اقوام متحدہ نے خبردار کردیا

نیویارک : داعش شام اورعراق میں دوبارہ سر اٹھا رہی ہے، اقوام متحدہ نے خبردار کردیا ،اطلاعات کےمطابق اقوام متحدہ کے ماہرین نے اپنی ایک تازہ رپورٹ میں خبردار کیا ہے کہ شدت پسند تنظیم داعش شام اور عراق میں دوبارہ منظم ہونے کی کوشش کر رہی ہے۔

اقوام متحدہ کے ماہرین کا کہنا ہے کہ یہ واضح نہیں کہ آیا ‘اسلامک اسٹیٹ’ کے نئے لیڈر ابو ابراہیم الہاشمی اپنے گروپ کی عملی قیادت میں کامیاب ہیں یا نہیں تاہم وہ ایسے منصوبوں پر کام کررہے ہیں۔اقوام متحدہ کے ممبر ممالک کی جانب سے لیےگئے جائزے کے مطابق انتظامی امور ،پروپیگنڈےاور بھرتیوں کے معاملے میں داعش کی حکمت عملی میں کوئی تبدیلی نہیں آئی ہے۔

بین الاقوامی خبر رساں ادارے کی ایک رپورٹ کے مطابق غیر ملکی افراد کے شام اور عراق میں داعش کی اس نام نہاد ’خلافت‘ کا حصہ بننے سے معاملہ اب بھی اتنا ہی سنگین ہے۔اقوام متحدہ کے ممبر ممالک کی جائزہ رپورٹ میں اندازہ لگایا گیا ہے کہ داوش میں شامل ہونے والے 40،000 غیر ملکی افراد میں تقریباً دو تہائی اب بھی زندہ ہیں ۔

رپورٹ میں کہا گیا کہ شام سے امریکی افواج کی تعداد میں کمی نے ملک کے شمال مشرق میں سیکیورٹی فورسز کی قابلیت کے بارے میں خدشات پیدا کردیے ہیں کہ حراست میں لیے گئے ایک لاکھ سے زائد جنگجوؤں (اور ان کے اہلخانہ )کی تعداد والے علاقے میں وہ اپنا کنٹرول قائم رکھ پائیں گی یا نہیں ۔

رپورٹ میں کہا گیا کہ کچھ ممالک اس مسئلے کو حل کرنے کا سب سے بہتر طریقہ یہ سمجھتے ہیں کہ داعش میں شامل افراد کو ان کے وطن واپس بھیجیں تاہم بعض ممالک ان افراد کی وطن واپسی کو قبول کرنے سے گریزاں ہیں۔واضح رہے کہ الہاشمی کو گزشتہ برس اکتوبر میں البغدادی کی ہلاکت کے بعد داعش کا لیڈر بنایا گیا تھا ۔