سرینگر:جموں و کشمیر: کورونا سے مزید 177 افراد متاثرپولیس اہلکار کا ٹیسٹ مثبت، کٹھوعہ پولیس اسٹیشن بند ،اطلاعات کے مطابق مقبوضہ جموں و کشمیر میں کورونا وائرس کے 177 نئے مثبت کیسزسامنے آئے ہیں جن میں 125 کا تعلق کشمیر صوبے اور 52 کا جموں صوبے سے ہیں۔اس طرح علاقے میں مثبت معاملات کی کل تعداد 2341 تک پہنچ گئی ہے۔
ساوتھ ایشین وائر کے مطابق جموں و کشمیر انتظامیہ کی طرف سے جاری کئے گئے روزانہ میڈیا بلیٹن میں بتایا گیا ہے کہ نوول کورونا وائرس کے 2341 مثبت معاملات سامنے آئے ہیں جن میں سے 1405 سرگرم کیسزہیں۔اس وائرس سے 28 افراد کی موت واقع ہوئی ہے۔ اب 908 افراد شفایاب ہوئے ہیں۔علاوہ ازیں اب تک 165225 افراد کو نگرانی میں رکھا گیا ہے جن کا سفری پس منظر ہے اور جو مشتبہ معاملات کے رابطے میں آئے ہیں۔ ان میں 36538 افراد کو ہوم کورنٹین میں رکھا گیا ہے جس میں انتظامیہ کی طرف سے چلائے جارہے قرنطینہ مراکز بھی شامل ہیں۔اس کے علاوہ 1405 کو ہسپتال آئیسولیشن میں رکھا گیا ہے جبکہ 43514 افراد کو گھروں میں نگرانی میں رکھا گیا ہے۔
ساوتھ ایشین وائر کے مطابق 83654 افراد نے 28 روزہ نگرانی مدت پوری کی ہے۔بلیٹن میں مزید کہا گیا ہے کہ اب تک 164581 ٹیسٹوں کے نتائج دستیاب ہوئے ہیں جن میں سے 30 مئی 2020 کی شام تک 162240 نمونوں کی رِپورٹ منفی پائی گئی ہے۔مقبوضہ جموں و کشمیر کے ضلع کٹھوعہ کے پولیس اسٹیشن میں تعینات ایک پولیس اہلکار کا کوروناوائرس ٹیسٹ مثبت آنے کے بعد مذکورہ پولیس اسٹیشن کو بند کردیا گیا ہے۔اورزنانہ پولیس اسٹیشن کٹھوعہ کو ہدایات دی گئی ہیں کہ وہ مذکورہ پولیس اسٹیشن میں تعینات تمام پولیس اہلکاروں کا کورونا ٹیسٹ منفی آنے تک اس کا کام کاج سنبھالے۔
ساوتھ ایشین وائر کے مطابق ایس ایس پی کٹھوعہ ڈاکٹر شیلندر مشرا نے کہا کہ کٹھوعہ پولیس اسٹیشن میں تعینات ایک پولیس اہلکار کا کورونا ٹیسٹ مثبت آیا ہے گرچہ وہ غیر علامتی تھا۔ساوتھ ایشین وائر کے مطابق انہوں نے کہا کہ کٹھوعہ پولیس اسٹیشن تب تک بند رہے گا جب تک اس میں تعینات تمام اہلکاروں کے ٹیسٹ منفی آئیں گے۔
