لاہور: انسداد دہشت گردی کی عدالت لاہور میں جناح ہاؤس حملہ کیس کا جیل ٹرائل شروع ہو گیا ہے۔ عدالت نے ملزموں کو فرد جرم عائد کرنے کے لئے 6 مارچ کو دوبارہ طلب کر لیا ہے۔
جج منظر علی گل نے کوٹ لکھپت جیل میں کیس کی سماعت کی۔ سماعت کے دوران زیر حراست پاکستان تحریک انصاف (پی ٹی آئی) کے رہنماؤں شاہ محمود قریشی، ڈاکٹر یاسمین، عمر سرفراز چیمہ، اعجاز چوہدری اور میاں محمود الرشید جیل میں حاضری مکمل کرانے کے لئے پیش ہوئے۔اس کے علاوہ ضمانت پر رہائی پانے والی ملزمائیں عالیہ حمزہ، خدیجہ شاہ، صنم جاوید اور روبینہ جمیل بھی جیل میں پیش ہوئیں۔عدالت نے تمام ملزموں کو حاضری یقینی بنانے کی ہدایت کی ہے تاکہ آئندہ سماعت پر کوئی بھی ملزم غیر حاضری نہ کرے۔
یاد رہے کہ پی ٹی آئی کے رہنماؤں پر الزام ہے کہ انہوں نے اپنے کارکنوں کو بغاوت اور فسادات پر اکسانے کی کوشش کی۔ اس مقدمے میں ملزموں کے خلاف تھانہ سرور روڈ میں مقدمہ درج کیا گیا ہے۔ملزموں پر الزام عائد کیا گیا ہے کہ انہوں نے جناح ہاؤس پر حملہ کیا اور ملک کی سالمیت کے خلاف اقدامات کیے۔ عدالت نے کیس کی مزید سماعت 6 مارچ تک ملتوی کر دی۔
