ممتاز حیدر
کراچی: جناح اسپتال میں ینگ ڈاکٹروں کے دو گروپوں میں جھگڑے کے نتیجے میں پانچ ڈاکٹرز زخمی ہوگئے۔ اسپتال حکام کے مطابق یہ جھگڑا اس وقت ہوا جب ینگ ڈاکٹروں کے ایک گروپ نے او پی ڈی (آؤٹ پیشنٹ ڈیپارٹمنٹ) کھولنے کی کوشش کی، جس پر دوسرے گروپ نے اسے بند کرنے کی کوشش کی۔
یہ تنازعہ گزشتہ ہفتے تیمارداروں کے ڈاکٹرز پر تشدد کے خلاف ہونے والے احتجاج سے جڑا ہوا تھا۔ وائی ڈی اے (ینگ ڈاکٹرس ایسوسی ایشن) کا ایک گروپ اس بات پر احتجاج کر رہا تھا کہ اسپتال میں تیمارداروں نے ڈاکٹروں کے ساتھ بدسلوکی کی تھی، جس کے نتیجے میں یہ صورتحال اور پیچیدہ ہوگئی۔اسپتال حکام کے مطابق، پولیس فوراً موقع پر پہنچ کر صورت حال کو قابو کرنے میں کامیاب ہو گئی۔ پولیس کی مداخلت کے بعد او پی ڈی دوبارہ کھول دی گئی اور کچھ ڈاکٹروں کو حفاظتی تدابیر کے تحت پولیس اپنے ساتھ لے گئی تاکہ کسی مزید بدامنی سے بچا جا سکے۔
اس تنازعے کے پس منظر میں وائی ڈی اے کے احتجاج کا معاملہ ابھی تک حل نہیں ہو سکا، اور اسپتال میں ینگ ڈاکٹروں کے گروپوں کے درمیان کشیدگی برقرار ہے۔ حکام کا کہنا ہے کہ اسپتال میں امن قائم کرنے کے لئے مزید اقدامات کیے جا رہے ہیں۔اس واقعے کے بعد جناح اسپتال میں ڈاکٹرز اور دیگر عملے کی حفاظت کو یقینی بنانے کے لئے اضافی سکیورٹی فراہم کی جائے گی۔
