بالی ووڈ اداکارہ جوہی چاولہ نے بالی ووڈ کنگ شاہ رخ خان کے نام پر 500 درخت لگانے کا عہد کیا ہے۔
باغی ٹی وی : بالی ووڈ میں اداکارہ جوہی چاولہ اور شاہ رخ خان کی دوستی کی مثالیں دی جاتی ہیں دونوں نے نا صرف ایک ساتھ کئی فلموں میں کام کیا ہے بلکہ بزنس پارٹنر ہونے کے ساتھ ساتھ ایک دوسرے کے بہترین دوست بھی ہیں۔
جوہی چاولہ ہر مشکل گھڑی میں شاہ رخ خان کے ساتھ کھڑی نظر آتی ہیں جس کی مثال حال ہی میں دیکھنے میں آئی جب جوہی چاولہ نے شاہ رخ خان کے بیٹے آریان خان کی منشیات کیس میں ایک لاکھ روپے کے ضمانتی مچلکوں کے عوض ضمانت دی اور ان کے ضمانت دینے کی وجہ سے ہی آریان خان کو جیل سے رہائی ملی اور اب جوہی چاولہ نے کنگ خان کی 56 ویں سالگرہ کے موقع پر ایک خوبصورت اعلان کرکے ان سے دوستی کا ایک اور ثبوت دیا ہے۔
گزشتہ روز کنگ آف بالی ووڈ شاہ رخ خان کی 56 ویں سالگرہ تھی۔ اس موقع پر جہاں دیگر فنکاروں نے انہیں سالگرہ کی مبارکباد دی وہیں جوہی چاولہ نے اعلان کیا کہ وہ شاہ رخ خان کے نام سے 500 درخت لگائیں گی۔
جوہی چاولہ نےفوٹو اینڈ ویڈیو شیئرنگ ایپ انسٹا گرام پر اپنے دوست اور اداکار شاہ رخ خان کو سالگرہ کی مبارکباد دینے کے لیے پرانی یادگار تصاویر پر مبنی ایک ویڈیو کلپ اور فوٹو کولاج شیئر کیا ہے۔
انہوں نےاپنی اس پوسٹ میں شاہ رخ خان کو سالگرہ کی مبارکباد دیتے ہوئے بتایا ہے کہ انہوں نے عہد کیا ہے کہ وہ اپنی پوری فیملی کی طرف سے شاہ رخ خان کے لیے 500 درخت لگائیں گی۔
