ممتاز حیدر
جنید فیملی فاؤنڈیشن نے گیٹس فاؤنڈیشن اور یونیسف کے ساتھ ایک تاریخی تعاون کا معاہدہ کیا ہے جس کا مقصد پاکستان میں خواتین کی صحت کو بہتر بنانے کے لیے ملٹیپل مائکرونیوٹرینٹ سپلیمنٹیشن (MMS) کی سہولت کو فروغ دینا اور اس کی فراہمی کو بڑھانا ہے۔
پاکستان میں ہر سال تقریباً 70 لاکھ خواتین حاملہ ہوتی ہیں، جن میں غذائیت کی کمی کے باعث ماں اور بچے کی صحت کو شدید خطرات لاحق ہوتے ہیں۔ MMS سپلیمنٹ کے ذریعے اس مسئلے کو کم کرنے میں عالمی سطح پر کامیابی حاصل کی گئی ہے، اور پاکستان میں بھی اس کی توسیع جاری ہے۔یہ معاہدہ تینوں اداروں کے درمیان اس شراکت داری کو رسمی شکل دیتا ہے تاکہ حاملہ خواتین تک MMS کی رسائی کو بڑھایا جا سکے، سپلائی چین کو مضبوط کیا جائے، تحقیق کو فروغ دیا جائے اور قومی سطح پر غذائی کمی کے حوالے سے آگاہی مہمات چلائی جا سکیں۔
جنید فیملی فاؤنڈیشن کے چیئرمین انصیر جنید نے کہا، "ہمیں فخر ہے کہ ہم گیٹس فاؤنڈیشن اور یونیسف کے ساتھ مل کر پاکستان میں ماں اور بچے کی صحت کے لیے کام کر رہے ہیں۔ ہمارا مقصد ہر حاملہ خاتون تک ضروری غذائیت پہنچانا ہے تاکہ صحت مند نسل کی بنیاد رکھی جا سکے۔”یہ معاہدہ حکومت کے مختلف اداروں کے ساتھ مل کر پالیسی سازی، تکنیکی معاونت، اور پرائیویٹ سیکٹر کے ساتھ شراکت داری کے ذریعے MMS کی مقامی پیداوار اور معیار کو بہتر بنانے پر بھی کام کرے گا۔
یونیسف اور گیٹس فاؤنڈیشن کے نمائندے بھی اس شراکت داری کی اہمیت پر زور دیتے ہوئے کہا کہ مشترکہ کوششوں سے ہی پاکستان میں ماں اور بچے کی صحت کے مسائل کو مؤثر انداز میں حل کیا جا سکتا ہے۔یہ معاہدہ جنید فیملی فاؤنڈیشن کی جانب سے اسلام آباد میں منعقدہ ایک تقریب میں دستخط کیا گیا، جس میں گیٹس فاؤنڈیشن اور یونیسف کے اعلیٰ حکام نے بھی شرکت کی۔
