ہالی وڈ فلم جراسک ورلڈ: ڈومینین کی شوٹنگ کورونا وائرس کے مثبت کیسز کی وجہ سے 2 ہفتوں کے لیے روک دی گئی۔
باغی ٹی وی :2 روز قبل ڈائناسور فرنچائز کی سائنس فکشن فلم ’جراسک ورلڈ‘ کی چھٹی فلم کی ریلیز ایک سال تک ملتوی کرنے کا اعلان کیا گیا تھا اوراب اسے جون 2022 تک ریلیز کیا جائے گا۔ جبکہ پہلے مذکورہ فلم کو 2021 میں ریلیز کیا جانا تھا۔
برطانوی خبررساں ادرے رائٹرز کی رپورٹ کے مطابق ڈائریکٹر کولن ٹریورو نے ٹوئٹ میں بتایا کہ یونیورسل پکچرز کی فلم جراسک ورلڈ: ڈومینین’ کی پروڈکشن سیٹ پر چند لوگوں کا کورونا وائرس ٹیسٹ مثبت آنے کے بعد 2 ہفتوں کے لیے معطل کردی گئی۔
انہوں نے کہا کہ بعدازاں ان تمام افراد کا ٹیسٹ منفی آیا لیکن ہمارے حفاظتی قواعد کے باعث ہم شوٹنگ میں 2 ہفتے کا وقفہ دے رہے ہیں تاہم کولن ٹریورو نے یہ نہیں بتایا کہ کس کا ٹیسٹ مثبت آیا۔
کورونا وائرس کے پھیلاؤ پر قابو پانے کے لئے کاسٹ اور عملے کے سخت پروٹوکول کے تحت جولائی میں ڈائناسور ایڈونچر فلم پر فلم بندی کا آغاز انگلینڈ میں دوبارہ ہوا۔ مارچ کے وسط میں وبائی بیماری کی وجہ سے پروڈکشن روک دی گئی تھی-
جراسک ورلڈ: ڈومینین’ کی شوٹنگ ابھی تک مکمل نہیں ہوئی ذرائع کا کہنا تھا کہ اس کی شوٹنگ مکمل ہونے میں 3 ہفتے باقی ہیں۔
یہ فلم فرنچائز کے 27 سال کے عرصے میں چھٹی فلم ہے جس کی کاسٹ میں ایک مرتبہ پھر کرس پراٹ، بریس ڈلاس ہوورڈ شامل ہیں دیگر اداکاروں میں لورا ڈرن، سیم نیل اور جیف گولڈبلم شامل ہیں۔
خیال رہے کہ مارچ میں عالمی وبا کی وجہ سے دنیا بھر میں فلم اور ٹی وی سیٹس بند ہونے کی وجہ سے مارچ کے وسط میں فلم کی شوٹنگ روک دی گئی تھی۔
کورونا وائرس کی وجہ سے دوسری بڑی ہا لی وڈ فلم کی شوٹنگ معطل ہوئی ہے اس سے قبل وارنر برادرس فلم "دی بیٹ مین”کوستمبر کے شروع میں پروڈکشن کو دو ہفتوں کے لئے بند کردیا گیا تھا اور رپورٹ کیا جارہا تھا کہ مرکزی اداکار روبرٹ پیٹسن کوویڈ 19 کا شکار ہوئے۔
خیال رہے کہ اس سیریز کی پہلی فلم ’جراسک پارک‘ کے نام سے 1993 میں ریلیز ہوئی تھی جس کے بعد اس کی دوسری فلم ’دی لاسٹ ورلڈ: جراسک پارک‘ 1997 میں ریلیز کی گئی ان دونوں فلموں کی کامیابی کے بعد اس کی تیسری فلم ’جراسک پارک تھری‘ کے نام سے سال 2001 میں ریلیز کی گئی اس سیریز کی چوتھی فلم ’جراسک ورلڈ‘ 2015 میں ریلیز کی گئی تھی فلم جراسک ورلڈ: فالن کنگ ڈم‘ 2018 میں ریلیز کی گئی تھی-
