کامونکی میں نالہ ڈیک میں طغیانی کی وجہ سے تین دیہات میں پانی داخل ہوگیا-
باغی ٹی وی : نجی خبررساں ادارے کی رپورٹ کے مطابق بھارت کی طرف سے پانی چھوڑنے کے بعد کامونکی کے علاقہ واہنڈو ، سکھانہ باجوہ تفنالہ اور ٹھٹھہ گلاب سنگھ کے مقام پر نالہ ڈیک میں شدید طغیانی آگئی ہے طغیانی کی وجہ سے تین دیہات میں پانی داخل ہوگیا اور درجنوں ایکڑ اراضی زیر آب آگئی ہے جبکہ موضع سکھانہ باجوہ میں پانی کا بہاؤ تیز ہونے کی وجہ سے نالہ ڈیک کے کنارے کا بڑا حصہ پانی میں بہہ گیا ہے-
علاقہ مکینوں کا کہنا ہے کہ اگر نالہ ڈیک میں شگاف پڑ گیا تو چالیس سے زائد دیہات زیر آب آجائیں گے،ممکنہ سیلاب کے پیش نظر واہنڈو ، گناعور ، سکھانہ باجوہ اور ننگل دونا سنگھ میں چار فلڈ ریلیف کیمپ قائم کرکے لائف جیکٹس اور کشتیوں کے ساتھ ریسکیو ٹیموں کو تعینات کردیا گیا ہے۔
