کراچی ائیرپورٹ پر لڑکی کو ہراساں کرنے کا معاملہ، امیگریشن افسر معطل

کراچی ڈائریکٹر ایف آئی اے نے کراچی ائیرپورٹ پر ایف آئی اے افسر کی جانب سے لڑکی کو مبینہ ہراساں کرنے کے معاملے کا نوٹس لے لیا۔ لڑکی کو مبینہ ہراساں کرنے کا واقعہ گزشتہ شام کے وقت پیش آیا اور بحرین سے آنے والی ایک لڑکی کو ایف آئی اے افسر نے مبینہ طور پر ہراساں کیا۔ ایف آئی اے حکام کے مطابق لڑکی کا الزام ہے کہ ایف آئی اے افسر نے اس سے نمبر مانگااور مٹھائی طلب کی جس پر لوگوں نے مبینہ ہراساں کرنے والے افسر کی ویڈیو بنالی جب کہ ویڈیو میں لوگوں کے سوالات پر ایف آئی اے افسر کوئی جواب نا دے سکا۔ دوسری جانب ایف آئی افسر کا کہنا ہے کہ اس نے لڑکی سے نمبر لسٹ میں لکھنےکے لیے مانگا اور مٹھائی مذاق میں مانگی۔ڈائریکٹر ایف آئی اے سندھ عامر فاروقی نے واقعے کا نوٹس لے کر امیگریشن افسر کو معطل کردیا اور افسر کو زون رپورٹ کرکے اس کے خلاف محکمہ جاتی کارروائی کا آغاز کردیا گیا ہے۔