کراچی،باغی ٹی وی (نمائندہ خصوصی) گلشن معمار میں چھت گرنے سے جاں بحق بچیوں سمیت 6 خواتین کی نماز جنازہ ادا
گلشن معمار افغان کیمپ میں چھت گرنے کے المناک حادثے میں جاں بحق ہونے والی 6 خواتین، جن میں 5 سگی بہنیں بھی شامل تھیں، کی نماز جنازہ گزشتہ روز افغان کیمپ میں ادا کر دی گئی۔
جاں بحق ہونے والی 6 خواتین، جن میں 4 کمسن بچیاں شامل تھیں، کی میتیں ایدھی سرد خانے سے غسل و کفن کے بعد ایمبولینس کے ذریعے افغان کیمپ پہنچائی گئیں۔ جنازے کے موقع پر کہرام مچ گیا، خواتین شدت غم سے نڈھال ہو گئیں جبکہ اہل خانہ، رشتہ داروں اور اہل محلہ کی بڑی تعداد نے نماز جنازہ میں شرکت کی۔ بعد ازاں تمام متوفیات کو قریبی قبرستان میں سپرد خاک کر دیا گیا۔
حادثہ ہفتے کی شب اس وقت پیش آیا جب متاثرہ گھر کی پری کاسٹ چھت کو مضبوط بنانے کے لیے اس پر بڑی مقدار میں ریت اور بجری ڈالی گئی، جس کا وزن چھت برداشت نہ کر سکی اور نیچے موجود افراد پر آگری۔ اس حادثے میں 5 سگی بہنوں سمیت 6 خواتین جاں بحق ہو گئیں۔
جاں بحق ہونے والی بہنوں کی شناخت 25 سالہ سعدیہ، 20 سالہ کائنات، 7 سالہ عشال، 7 سالہ عائشہ اور 6 سالہ ثانیہ دختر رضا کے نام سے ہوئی، جبکہ 8 سالہ نسرین دختر میکائل بھی حادثے کا شکار بنیں۔
