کراچی کے علاقے گڈاپ ٹاؤن میں مشترکہ کارروائی کرتے ہوئے 2 انتہائی مطلوب دہشتگرد گرفتار

پاکستان رینجرز (سندھ)اور پولیس نے انٹیلی جنس معلومات کی بنیاد پرکراچی کے علاقے گڈاپ ٹاؤن میں مشترکہ کارروائی کرتے ہوئے 2 انتہائی مطلوب دہشتگرد عبدالہادی عرف شیخ عرف عادل عرف بشیر اور اختر غنی کو گرفتار کرلیا۔ملزمان کے قبضے سے اسلحہ، ایمونیشن اور بارودی مواد بھی برآمد کیا گیا۔ تفصیلات کے مطابق گرفتار ملزمان حزب الاحرار تحریک طالبان پاکستان کے سرگرم رکن ہیں اور کراچی میں بڑی دہشتگردی کی منصوبہ بندی کر رہے تھے، ملزمان نے 27فروری 2021کو تھانہ سہراب گوٹھ کے علاقہ میں اختر منیر ولد رحمت شاہ نامی بزنس مین سے 50لاکھ روپے بھتہ کی ڈیمانڈ کی، بھتہ نہ دینے کی صورت میں تاجر کو فائرنگ کر کے شدید زخمی کر دیا۔ اس کے علاوہ ملزمان گڈاپ ٹاؤن کے علاقے میں متعدد کاروباری حضرات کو بھتہ کی ڈیمانڈ سمیت متعدد ڈکیتی راہزنی کی کارروائیوں میں بھی ملوث رہے ہیں۔ ملزمان کے دیگر ساتھیوں کی گرفتاری کے لیے چھاپے مارے جا رہے ہیں۔ گرفتار ملزم کو بمعہ اسلحہ، ایمونیشن اور مسروقہ سامان قانونی کارروائی کے لیے پولیس کے حوالے کر دیا گیا ہے۔