انسداد دہشتگردی عدالت میں سانحہ چکرا گوٹھ کیس کی سماعت ہوئی
ایم کیو ایم لندن کے بدنام زمانہ ٹارگٹ کلر رئیس مما سمیت دیگر ملزمان کو عدالت میں پیش کردیا گیا ،رئیس الدین عرف مما کے وکیل کی جانب سے طبی سہولیات فراہمی کی درخواست دائر کی گئی، عدالت نے رئیس مما کو طبی سہولت فراہمی کی درخواست پر جیل سپریٹنڈنٹ سے رپورٹ طلب کرلی ،عدالت نے تفتیشی افسر کو آئندہ سماعت پر گواہوں کو پیش کرنے کا حکم دے دیا۔
عدالت نے ٹارگٹ کلر رئیس مما کو جیل میں بی کلاس کی سہولیات فراہمی سے متعلق درخواست پر بھی دلائل طلب کرلئے،عدالت نے آئندہ سماعت پر تمام ملزمان کو حاضری یقینی بنانے کی ہدایت کردی، پراسیکیوشن نے دلائل دیتے ہوئے کہا کہ مقدمے میں بدنام زمانہ ٹارگٹ کلرز رئیس عرف مما، کامران عرف مادھوری ، شاہ جہان عرف شٹن، ظہیرعرف فنٹرسمیت 21 ملزمان شامل ہیں۔ ایم کیو ایم کے تنظیمی کمیٹی کے سابق انچارج حماد صدیقی سمیت 5 ملزمان کو اشتہاری قرار دیا جا چکا ہے ، عدالت نے کیس کی سماعت 6 اکتوبر تک ملتوی کردی
ملزم رئیس مما نے 2011 میں کورنگی میں اپنی دہشت اوراجارہ داری قائم رکھنے کیلیے چکرا گوٹھ میں پولیس وین پرحملہ کیا تھا، فائرنگ سے ریزرو پولیس کے 3 اہلکار جاں بحق اور اہلکار سمیت 27 افراد زخمی ہوئے تھے
