کراچی شہر کو بنیادی حقوق سے محروم رکھنا ایک منظم سازش محسوس ہورہی ہے،سلیم قادری

اہلسنّت حنفی بریلوی مساجد کی انتظامی کمیٹیوں کے اکابرین اورمیلادشریف کا اہتمام کرنے والی نمائندہ تنظیمات وشخصیات پر مشتمل مرکزی میلادالائنس پاکستان کے بانی وچیف آرگنائزر،مرکزی انجمن سیرت النبی ﷺ گلبہارکے تاحیات چیئرمین اور ممتازقومی وسماجی رہنمامحمدسلیم خاں قادری ترابی نے کہاہے کہ کراچی شہر کو بنیادی حقوق سے محروم رکھنا ایک منظم سازش محسوس ہورہی ہے،کم ازکم K الیکٹرک اس سازش کا بڑاحصہ اداکررہی ہے۔
وہ مرکزی میلادالائنس کے مشاورتی اجلاس سے خطاب کررہے تھے،جس کی صدارت جمعیت علمائے پاکستان کے رہنمافقیر ملک محمدشکیل قاسمی نے کی۔جبکہ غوثیہ مسجد گلبہار کے ٹرسٹی رکن ناصرحسین خاں، بزم غلامان مصطفیٰ ﷺ کے صدر صاحبزادہ محمدصادق قریشی، انجمن نوجوانان اسلام سندھ کے جنرل سیکریٹری عبدالوحید یونس ودیگر نے خصوصی شرکت کی۔
محمدسلیم خاں قادری ترابی نے کہاکہ مسائل کے حل کے لئے اجتماعی جدوجہد کی ضرورت ہے ،Kالیکٹرک کے بل دیکھ کر غریبوں کی چینخیں نکل رہی ہیں مگر ارباب حل وعقد کے کانوں پر جوں بھی نہیں رینگتی،Kالیکٹرک کے ذمہ داران جان بوجھ کر لوڈشیڈنگ میں مسلسل اضافہ کررہے ہیں،پانی کی کمی کے ڈرامے رچائے جارہے ہیں، ندی نالوں کی صفائی سے گریزاں واٹربورڈ کے ذمہ داران گلی کوچوں میں ابلتے گٹر، بہتے ہوئے گندے پانی پر کسی کی توجہ نہیں ،کچرے کے ڈھیر اور شدید گرمیوں میں مچھروں مکھیوں کی بھرمار نے لوگوں کاجینامحال کردیاہے، روزمرہ کی کھانے پینے اور استعمال کی اشیاء کی قیمتوں میں ہوش ربامہنگائی پر شرمندگی کا اظہار کرنے کے بجائے حکمران ایک دوسرے پر الزام تراشیاں کرکے عوام کو ذہنی مریض بنانے کا عمل کررہے ہیں۔

محمدسلیم خاں قادری ترابی نے کہاکہ عوام کو اس بات میں کوئی دلچسپی نہیں ہے کہ کون کیاکررہاہے وہ صرف اپنے حقوق چاہتے ہیں۔مرکزی میلادالائنس پاکستان عوام اہلسنّت حنفی بریلوی کے حقوق کے حصول کے لئے جدوجہد پر یقین رکھتاہے مگر افسوس ہے کہ ہمیں شہر کراچی کے تمام عوام کو ایک ساتھ لے کر عوامی تحریک میں بدلنے پر مجبورکیاجارہاہے۔انہوں نے کہاکہ کراچی کے عوام اپنے اوپر ہونے والے مظالم پر سراپااحتجاج ہوئے تو پھر انہیں سنبھالنامشکل مشکل ہوگااس لئے حکمرانوں کو ہوش میں آجاناچاہئے اور عوام کے بنیادی حقوق کی فراہمی کو یقینی بنانے پر توجہ دینی چاہئے ،کراچی پورے پاکستان کا دل ہے۔
مرکزی میلادالائنس پاکستان کے ذمہ داران کراچی کے خلاف ہونے والی ہر سازش کے سامنے سیسہ پلائی ہوئی دیوار بن کر پاکستان اور کراچی کی سالمیت ،استحکام، ترقی اور خوشحالی کے لئے ہر قسم کی قربانی دینے کا عزم رکھتے ہیں۔