کراچی میں راشن دلوانے کا جھانسہ دے کر خاتون کو زیادتی کا نشانہ بنا دیا گیا

کراچی : شہر قائد میں راشن دلوانے کے بہانے خاتون کو جھانسہ دے کر ہوس کا نشانہ بنا دیا گیا۔

تفصیلات کے مطابق کراچی کے علاقہ شاہ لطیف ٹاؤن میں راشن دینے کا جھانسہ دے کر غریب خاتون کو زیادتی کا نشانہ بنایا گیا۔ کراچی کی بن قاسم پولیس نے ملزم پرویز جٹ کو گرفتار کرکے واقعہ کا مقدمہ درج کرلیا ہے۔ واضح رہے کہ کراچی میں خواتین کے ساتھ مبینہ زیادتی کے واقعات میں اضافہ ہوتا جارہا ہے لیکن پولیس ایسے واقعات میں کمی لانے میں ناکام ہوتی دکھائی دے رہی ہے۔
قبل ازیں کراچی کے علاقہ گلشن حدید میں پولیس اہلکار نے لڑکی کو زیادتی کا نشانہ بنا دیا۔ پولیس کا کہنا ہے کہ کراچی کے علاقے گلشن حدید میں 18 سالہ لڑکی کے ساتھ رشتے دار کی جانب سے زیادتی کا مبینہ واقعہ پیش آیا ، جس کے بعد ملزم کو گرفتار کرلیا گیا ہے۔

پولیس کی جانب سے جاری بیان میں بتایا گیا کہ لڑکی سے زیادتی کا مقدمہ متاثرہ لڑکی کے والد کی مدعیت میں اسٹیل ٹاؤن تھانے میں درج کیا گیا جس کے مطابق ملزم وقار پولیس اہلکار ہے جو لڑکی کا رشتے دار بھی ہے۔

پولیس نے بتایا کہ ملزم وقار پہلے سے شادی شدہ ہے، ملزم اور متاثرہ لڑکی کے میڈیکل کے بعد مزید تفتیش کی جائے گی۔ واضح رہے کہ جوں جوں ملک بھر میں جنسی زیادتی کے واقعات میں اضافہ ہو رہا ہے ویسے ہی ان واقعات کے رپورٹ ہونے کے بعد انصاف کی فراہمی میں بھی تاخیر ہو رہی ہے۔ ایک اندازے کے مطابق ’پاکستان میں روزانہ 11 خواتین اور آٹھ بچے زیادتی کا شکار ہوتے ہیں۔