بالی ووڈ کی خوبرو اور باربی ڈول کے نام سے مشہور اداکارہ کترینہ کیف نے ایک بار اداکار اکشے کمار اوراداکار ارجن کپور کو راکھی باندھنے کی خواہش ظاہر کی تو دونوں نے کترینہ کو لاجواب کردیا۔
باغی ٹی وی :بھارتی میڈیاکے مطابق کترینہ کیف کا کوئی بھائی نہیں ہے جس کے لیے انہوں نے متعدد اداکاروں کو راکھی باندھنے کی خواہش ظاہر کی تاہم کسی نے بھی کترینہ کو بہن بنانے میں دلچسپی نہیں لی۔
اداکارہ کترینہ کیف نے ’کافی ود کرن‘ میں انٹریو کے دوران انکشاف کیا کہ میں اکشے کمار کو بہت اچھا دوست سمجھتی ہوں اس لیے ’تیس مار خان‘ کی شوٹنگ کے دوران میں نے اکشے کمار کو راکھی باندھنے کی خواہش ظاہر کی تو اکشے کمار بھڑک گئے اور جواب میں مجھے کہا ’’کیا آپ تھپڑ کھانا پسند کریں گی‘‘
کترینہ کیف نے مزید بتایا کہ میں نے اسی رات ایک تقریب کے دوران اداکار ارجن کپور سے کہا کہ تم میرے بھائی بن جاؤ، میں تمہیں راکھی باندھتی ہوں، جس پر ارجن کپور نے دوڑ لگادی اور تقریب سے چلے گئے، پھر واپس بھی نہیں آئے۔
واضح رہے کہ بالی ووڈ کے کھلاڑی اکشے کمار اور کترینہ کیف ’نمستے لندن‘، ’دے دنا دن‘، ’تیس مار خان‘سمیت متعدد فلموں میں ایک ساتھ کام کرچکے ہیں جب کہ یہ آن اسکرین جوڑی روہت شیٹھی کی ہدایت کاری میں بننے والی میگا بجٹ فلم ’سوریاونشی‘ میں بھی ایک ساتھ دکھائی دے گی۔
