کیماڑی آئل ٹرمینل پرآگ لگنے سے ملک بھر میں تیل کی سپلائی معطل

کیماڑی آئل ٹرمینل پرآگ لگنے سے ملک بھر میں پیٹرولیم مصنوعات کی سپلائی معطل ہوگئی۔

آل پاکستان آئل ٹینکرز ایسوسی ایشن کے وائس چیئرمین شمس شاہوانی کا کہنا ہےکہ آگ سے ہمارا کافی نقصان ہوا ہے، حالات کی بہتری تک پیٹرولیم مصنوعات کی سپلائی روک دی اور فی الحال اپنی گاڑیاں آئل ٹرمینل سے ہٹالی ہیں، آگ پر قابو پانے کے بعد صورتحال دیکھ کرسپلائی بحالی کا فیصلہ کریں گے۔

ریسکیو حکام کے مطابق کیماڑی آئل ٹرمینل پر فائر بریگیڈ کی 6 گاڑیاں آگ بجھانے میں مصروف ہیں جب کہ آتشزدگی سے 4 افراد زخمی بھی ہوئے ہیں۔

ترجمان پاک بحریہ کے مطابق پاک بحریہ کی ٹیم اور فائر ٹینڈرز کیماڑی میں آئل ٹرمینل میں لگی آگ بجھانے میں معاونت کررہے ہیںپولیس کاکہنا ہےکہ جس پائپ لائن میں آگ لگی اس کی سپلائی بند کردی ہے اور آگ کو مزید بڑھنے سے روک دیا گیا ہے۔

آئل ٹرمینل پر آتشزدگی کے باعث ٹریفک کو آئی سی آئی پل سے متبادل راستے کی جانب بھیجا جارہا ہے
کیماڑی میں شیل پاکستان ٹرمینل کے اندر سے گزرنے والی 20 انچ قطر کی پی ایس او کی درآمد لائن کو آگ لگ گئی ، حکام نے فوری کارروائی کی ، شیل پاکستان ٹیم کے ساتھ فائر بریگیڈ ، ہنگامی امدادی عملہ موجود ہے اور حفاظت کو یقینی بنانے میں اپنا تعاون جاری رکھے ہوئے ہیں۔