ڈپٹی کمشنر اچانک پہنچ گئے عملہ غائب، سٹال خالی

گجرات (نمائندہ باغی ٹی وی) ڈپٹی کمشنر گجرات کا رمضان بازار جلالپورجٹاں کا اچانک دورہ۔ عملہ غائب، سٹالز خالی، سیکورٹی پولیس کی عدم موجودگی پر ڈاکٹر خرم شہزاد کا اظہارِ برہمی۔ تفصیل کے مطابق گزشتہ روز تقریباََ ساڑھے 5بجے شام ڈپٹی کمشنر گجرات ڈاکٹر خرم شہزاد نے رمضان سستے بازار جلالپورجٹاں کا اچانک دورہ کیا۔ رمضان بازار آمد پر انتظامیہ کی عدم موجودگی، پر تشویش کا اظہار کیا۔مارکیٹ کمیٹی کے سٹالز خالی دیکھنے پر سیکرٹری مارکیٹ کمیٹی سرور وڑائچ کے بارے میں باز پرس کی تو انہیں بتایا گیا کہ گزشتہ کئی یوم سے وہ مسلسل رمضان بازار سے غیر حاضر ہیں۔جس پر ڈاکٹر خرم شہزاد نے اس عمل کو غیر ذمہ دارانہ قرار دیا۔ چینی و کریانہ کے سٹالز بھی خالی ہونے پر بھی انھوں نے ذمہ داران کی کارکردگی کو مایوس کن قرار دیا۔ رمضان بازار کے سپوکس مین ضیغم رشید کو مخاطب کرتے ہوئے ہدایات جاری کیں کہ صبح 9 تا سہ پہر 6بجے رمضان بازار میں تعینات تمام عملے کو اپنی موجودگی یقینی بنانا ہوگی۔ جبکہ رمضان سستے بازار کے ثمرات عوام تک پہنچانے کے لئے تمام سٹاف کو تفویض کردہ ذمہ داریاں پوری کرنی ہونگی۔ جبکہ سیکورٹی پولیس کی عدم موجودگی پر بھی برہمی کا اظہار کیا۔