انسداد دہشت گردی عدالت نے مشہور ڈرامہ نگار خلیل الرحمان قمر کے ہنی ٹریپ اور اغوا برائے تاوان کے کیس میں فیصلہ سنا دیا ہے۔ عدالت نے تین ملزمان کو سزا سنائی ہے، جبکہ دیگر کو بری کر دیا ہے۔
لاہور کی انسداد دہشت گردی عدالت میں جج ارشد جاوید نے کیس کی سماعت کی اور فیصلہ سنایا کہ ملزمان آمنہ عروج، ممنون حیدر اور ذیشان کو تاوان طلب کرنے کے جرم میں سات، سات سال قید کی سزا سنائی جائے گی۔ تاہم عدالت نے واضح کیا کہ اغوا کا الزام ثابت نہیں ہو سکا، جس کی بنا پر ملزمان کو اغوا کے جرم میں سزا نہیں دی گئی۔
عدالت نے مزید کہا کہ حسن شاہ سمیت دیگر نامزد افراد کو ناکافی شواہد کی بنیاد پر بری کر دیا گیا۔ پراسیکیوشن کی جانب سے اس کیس میں 17 گواہوں کی شہادتیں قلمبند کرائی گئیں، جن کی روشنی میں یہ فیصلہ سنایا گیا۔
یاد رہے کہ اس مقدمے میں خلیل الرحمٰن قمر کو مبینہ طور پر ہنی ٹریپ کا شکار بنایا گیا تھا اور بعد ازاں ان سے تاوان طلب کیا گیا تھا۔ یہ کیس میڈیا کی بھرپور توجہ کا مرکز رہا اور خلیل الرحمٰن قمر نے بھی اس واقعہ کے حوالے سے مختلف مواقع پر بات کی تھی۔
