بالی ووڈ کے لینجڈری اور سینئیر اداکار امیتابھ کی نواسی نویا نویلی نندا نے خواتین کے جینز پہننے سے متعلق وزیراعلیٰ اتر کھنڈ کے متنازع بیان پر برہمی کا اظہار کیا ہے۔
باغی ٹی وی : بگ بی امیتابھ بچن کی نواسی نویا نویلی نندا سوشل میڈیا پر کافی متحرک ہیں لہذا جیسے ہی کوئی چیز انہیں بری لگتی ہے فوراً سوشل میڈیا کا استعمال کرتے ہوئے جواب دیتی ہیں چند روز قبل بھی نویا نے والدہ کو کام نہ کرنے کا طعنہ دینے والے کو کرارا جواب دیا تھا تاہم اس بار اترکھنڈ کے وزیراعلیٰ کے بیان پر برہمی کا اظہار کیا ہے۔
بھارتی میڈیا کے مطابق اترکھنڈ کے وزیراعلیٰ تیراٹھ سنگھ راوت نے خواتین سے متعلق متنازع بیان دیتے ہوئے کہا تھا کہ خواتین کا پھٹی ہوئی جینز پہنا سماجی تباہی کا باعث ہے اور یہ کوئی اچھی مثال نہیں۔
اترکھنڈ کے وزیراعلیٰ کے بیان پر نہ صرف سوشل میڈیا صارفین پھٹ پڑے بلکہ امیتابھ بچن کی نواسی نویا نے شدید غصے کا اظہار کرتے ہوئے کہا کہ ہمارے کپڑے بدلنے سے پہلے اپنی ذہنیت کو بدلو، نویا نے انسٹاگرام پر جینز پہنی ہوئی تصویر ڈالی اور کہا کہ میں تو پھٹی ہوئی جینز پہنوں گی اور فخر کے ساتھ پہنوں گی۔
