سابق صدر آصف علی زرداری نے پیپلز پارٹی پنجاب کے جنرل سیکرٹری چودھری منظور احمد کو ٹیلی فون کیا ہے.
آصف علی زرداری نے کہا کہ پی ڈی ایم متحد ہے، حکومت پر ہر طرف سے وار کرے گی، ملک شدید خطرات میں ہے، حکمران کوئی بڑا بلنڈر کر سکتے ہیں.
انہوں نے کہا کہ حکومت کو گھر بھیجنا اس وقت بہت ضروری ہو چکا ہے، اناڑی حکمرانوں کی نااہلی سے ملک کسی بڑے حادثے کا شکار ہو سکتا ہے. انہوں نے کہا کہ حکومت سے نجات کیلئے پی ڈی ایم تمام آپشنز بتدریج استعمال کرے گا، اگلے چند مہینے ملکی سیاست کے مستقبل کیلئے بہت اہم ہیں. انہوں نے کہا کہ حکمرانوں کو اب مزید کرونا کے پیچھے چھپنے نہیں دیں گے، نہ یہ ویکسین خرید سکے نہ ہی بے نظیر انکم سپورٹ پروگرام کے علاوہ یہ کرونا پر عوام کی مدد کر سکے.آصف علی زرداری نے کہا کہ ہم نے 2008 کے عالمی معاشی بحران کے باوجود ایکسپورٹ 19 ارب سے 26 ارب تک بڑھائی، ملک کا ریونیو ڈبل کیا، ملازمین کی 125فیصد تنخواہیں بڑھائیں،سرکاری ملازمین کی پینشن میں 100 فیصد اضافہ کیا،اناڑی حکمرانوں نے آج ملک کے تمام اشاریے منفی کر دئے ہیں. انہوں نے کہا کہ میں نے پہلے کہا تھا یہ سلیکٹڈ حکمران اپنے وزن سے خود گریں گے، اب یہ گر چکے ہیں، بس اب ایک آخری دھکے کی ضرورت ہے.
انہوں نے مزید کہا کہ پی ڈی ایم کے ساتھ ملکر پیپلز پارٹی اس ناکام اور ناہل ٹولے کو گھر بھیجے گی.
