کم کارڈیشیان کا کانیے ویسٹ سے علیحدگی کا فیصلہ

ہالی وڈ ٹی وی اسٹار کم کارڈیشیان اور پروڈیوسر و فیشن ڈیزائنر کانیے ویسٹ نے 7 سال بعد طلاق لینے کا فیصلہ کرلیا۔

باغی ٹی وی : غیر ملکی میڈیا کے مطابق کم کارڈیشیان نے کانیے ویسٹ سے علیحدگی کے سلسلے میں اٹارنی لورا ویسر کی خدمات حاصل کی ہیں۔

رپورٹس کے مطابق کم کارڈیشیان کو چھٹیوں کے دوران اپنے شوہر کانیے ویسٹ اور شادی کی انگوٹھی کے بغیر دیکھا گیا جب کہ کانیے نے بھی مبینہ طور پر کم کارڈیشیان کے بغیر چھٹیاں اپنے 14 ملین ڈالرز کے وومنگ فارم پر گزاریں۔

رپورٹس کے مطابق کم کارڈیشیان نے ماضی میں کانیے ویسٹ کی ذہنی پریشیانیوں کو ختم کرنے میں ان کی بہت زیادہ مدد کی ہے لیکن اب بس۔ کم کارڈیشیان کی طلاق کی وجہ بتاتے ہوئے کہا جارہا ہے کہ کم وکالت کا امتحان دینے کے لیے سنجیدہ ہیں اور وہ وکیل بننا چاہتی ہیں اور کم کارڈیشیان کانیے کی ان حرکتوں سے پریشان آگئی تھیں۔

میڈیا رپورٹس کے مطابق کانیے کا کہنا ہے کہ کارڈیشیان فیملی ان پر نفسیاتی علاج کروانے کے لیے دباؤ ڈال رہی ہے۔

واضح رہے کہ کانیے نے حال ہی میں امریکا میں ہونے والے صدارتی انتخابات میں بطور آزاد امیدوار حصہ لیا تھا۔ تاہم وہ انتخابات میں ناکام رہے تھے لیکن انہوں نے اگلے انتخابات میں پھر سے میدان میں اترنے کا عندیہ دیاتھا۔