لاہور میں جماعت اسلامی کا دھرنا: تیاریاں عروج پر

امیر جماعت اسلامی پاکستان حافظ نعیم الرحمان کے اعلان کے مطابق لاہور میں دھرنے کی تیاریاں زور و شور سے جاری ہیں۔ امیر لاہور ضیاء الدین انصاری ایڈووکیٹ نے امیر غربی عبدالعزیز عابد کے ہمراہ زون 165 کا دورہ کیا اور دھرنے کی تیاریوں کا جائزہ لیا۔زون 165 کے اجلاس میں امیر زون رانا اصغر علی، سیکرٹری شاہد ملک، نائب امیر غربی سید راشد داؤد اور دیگر کارکنان نے شرکت کی۔ اس موقع پر عبدالعزیز عابد نے کہا کہ اسلام آباد دھرنے میں زون 165 کی بڑی تعداد شریک ہو چکی ہے، اور اب بھی حافظ نعیم الرحمان کی کال پر ہم دھرنے کے لیے تیار ہیں۔انہوں نے مزید کہا کہ جماعت اسلامی کا دھرنا مطالبات کی منظوری تک جاری رہے گا اور حکومت کو گھٹنے ٹیکنے پر مجبور کر دے گا۔ ان کا کہنا تھا کہ فارم 47 کے حوالے سے جماعت اسلامی کی جدوجہد عوام کو ریلیف دلانے کے لیے ہے اور اس مقصد کے حصول تک دھرنا ختم نہیں ہوگا۔اجلاس میں ضیاء الدین انصاری نے دھرنے کے لیے کارکنان کی حوصلہ افزائی کی اور تیار رہنے کی ہدایت دی۔ جماعت اسلامی کے کارکنان حکومت پر دباؤ بڑھانے کے لیے پرعزم ہیں اور دھرنے کی کامیابی کے لیے مکمل تیاریاں کر رہے ہیں۔