لاہور میں ایک حیران کن واقعے میں، پنجاب اسمبلی کے باہر قائم پاکستان تحریک انصاف (پی ٹی آئی) کے بھوک ہڑتالی کیمپ کے قریب مشہور اداکار اور کامیڈین طاہر انجم پر تشدد کیا گیا۔واقعے کی تفصیلات کے مطابق، جب طاہر انجم کیمپ کے قریب سے گزر رہے تھے تو ایک خاتون نے ان پر حملہ کر دیا۔ خاتون نے نہ صرف انہیں تھپڑ مارے بلکہ ان کے کپڑے بھی پھاڑ دیے۔ حملہ آور خاتون کا نام انیلا بتایا گیا ہے، جو خود کو ‘نیلی پری’ کہتی ہے۔نیلی پری نے الزام لگایا کہ طاہر انجم نے پی ٹی آئی کے بانی عمران خان کو دہشت گرد کہا تھا، جس پر انہوں نے یہ اقدام کیا۔ حاضرین نے بڑی مشکل سے اداکار کو محفوظ مقام پر پہنچایا۔
طاہر انجم، جو مسلم لیگ (ن) کے کلچر ونگ پنجاب کے صدر ہیں، نے کہا کہ وہ صرف ویڈیو بنا رہے تھے جب ان پر حملہ کیا گیا۔ انہوں نے بتایا کہ حملے میں ان کا ایک دانت ٹوٹ گیا ہے اور وہ اس واقعے کے خلاف قانونی کارروائی کریں گے۔دوسری جانب، پی ٹی آئی کے رہنما ملک احمد خان بھچر نے حملہ آور خاتون سے لاتعلقی کا اظہار کیا ہے۔ انہوں نے کہا کہ یہ خاتون ان کی پارٹی کی ورکر نہیں ہے اور پولیس کو اس کے خلاف کارروائی کرنی چاہیے۔
