لاہور پولیس کی بڑی کامیابی، خطرناک گینگ گرفتار کر لیا

ایس پی سی آئی لاہور عاصم افتخار کی سربراہی میں سی آئی اے صدر ڈویژن کی کارروائی۔
پولیس کے مطابق موٹر سائیکل چوری کی وارداتوں میں ملوث موٹر سائیکل چور گینگ کے 3ریکارڈ یافتہ ملزمان گرفتار کر لیے گئے۔ گرفتار ملزمان میں گروہ کا سرغنہ مجاہد عرف کالا اور اس کے 2ساتھی حنیف عرف طوطی اور کمال خان شامل ہیں۔ ملزمان سے وارداتوں میں استعمال ہونیوالا مزدا ٹرک، موٹر سائیکلیں،2کلو سے زائد چرس اور جعلی کرنسی برآمد کر لی گئی۔ ریکارڈ یافتہ ملزمان نے شہر کے مختلف علاقوں میں موٹر سائیکل چوری کی100سے زائد وارداتوں کا انکشاف کیا ہے۔ ملزمان چوری شدہ موٹر سائیکلوں کو مزدا ٹرک میں لوڈ کر کے بلوچستان لے جا کر فروخت کر دیتے تھے۔ ڈی ایس پی سی آئی اے صدر دانش آصف رانجھا نے مختلف معلومات سمیت جدید ٹیکنالوجی کی مدد سے ملزمان کو گرفتار کیا۔