لاہور(باغی ٹی وی) شادی کی تقریب میں ناقص کھانے کے باعث 200 سے زائد مہمان فوڈ پوائزننگ کا شکار ہوگئے، جن میں سے متعدد کی حالت تشویشناک بتائی جا رہی ہے۔ متاثرہ افراد کو فوری طور پر مختلف اسپتالوں میں منتقل کر دیا گیا، جبکہ انتظامیہ نے تحقیقات کا آغاز کر دیا ہے۔
تفصیلات کے مطابق لاہور کے علاقے خیابانِ امین کے رہائشی سرفراز کی شادی ایک نجی شادی ہال میں منعقد کی گئی، جہاں مہمانوں کے لیے پیش کیا گیا کھانا غیر معیاری ثابت ہوا۔ تقریب میں شرکت کرنے والے 360 میں سے 200 سے زائد افراد کھانے کے بعد شدید طبیعت خراب ہونے کی شکایت کرنے لگے، جس کے بعد انہیں فوری طور پر قریبی ہسپتالوں میں منتقل کیا گیا۔
ہسپتال ذرائع کے مطابق جنرل اسپتال میں داخل 9 افراد کی حالت تشویشناک ہے جبکہ رائیونڈ انڈس ہسپتال میں 27 متاثرین کو طبی امداد دی جا رہی ہے۔ دیگر مریضوں کو بھی مختلف ہسپتالوں میں منتقل کیا گیا ہے، جہاں انہیں ضروری طبی امداد فراہم کی جا رہی ہے۔
شادی کے میزبان سرفراز نے الزام عائد کیا ہے کہ ستوکتلہ مارکی انتظامیہ نے انتہائی ناقص اور غیر معیاری کھانا فراہم کیا، جس کی وجہ سے مہمانوں کی طبیعت بگڑ گئی۔ متاثرین کے اہلِ خانہ نے بھی ذمہ داروں کے خلاف سخت کارروائی کا مطالبہ کیا ہے۔
واقعے کے بعد مقامی انتظامیہ نے شادی ہال کو سیل کرنے اور واقعے کی مکمل تحقیقات کرنے کا حکم دے دیا ہے۔ حکام کا کہنا ہے کہ کھانے کے نمونے لیبارٹری بھیج دیے گئے ہیں اور ذمہ داروں کے خلاف سخت کارروائی کی جائے گی۔
متاثرین اور اہلِ خانہ کی جانب سے ناقص کھانے کے خلاف شدید احتجاج بھی کیا جا رہا ہے، جبکہ شہریوں نے انتظامیہ سے مطالبہ کیا ہے کہ ہوٹلوں اور شادی ہالز میں کھانے کے معیار کو یقینی بنانے کے لیے سخت اقدامات کیے جائیں۔
