ڈیرہ غازیخان (باغی ٹی وی) وزیر اعلیٰ نے بہاولپور اور ڈیرہ غازی خان میں پیداوار بڑھانے کیلئے لائیو سٹاک ایمرجنسی لگانے کا اعلان کیااور لائیوسٹاک کی پیداوار بڑھانے کے لئے پلان فوری طلب کرلیا
وزیراعلی پنجاب محسن نقوی نے ڈیرہ غازی خان میں انسٹیٹیوٹ آف کارڈیالوجی، ویٹرنری ہسپتال اور لائیوسٹاک بزنس اینڈ انکوبیشن سینٹر کے دورے کئے۔وزیر اعلیٰ محسن نقوی نے ڈیرہ غازی خان انسٹی ٹیوٹ آف کارڈیالوجی مکمل طور پر فنکشنل کرنے اور ڈاکٹروں، نرسوں اور پیرا میڈیکل سٹاف کی کمی کو فوری طور پر پورا کرنے کا حکم دیا۔
وزیراعلیٰ محسن نقوی نے صوبائی وزراء عامر میر اور ابراہیم مراد کے ہمراہ کارڈیالوجی انسٹیٹیوٹ کے بیسمنٹ، گراؤنڈ فلور اور فرسٹ فلور کا تفصیلی دورہ کیا۔
وزیر اعلیٰ محسن نقوی نے گیما کیمرہ، سی ٹی سکین اور ایم آر آئی روم کا معائنہ کیا۔وزیراعلیٰ محسن نقوی نے ہسپتال کے کیفے ٹیریا، ویٹنگ ایریا اور سرائے کا بھی دورہ کیا۔ وزیراعلیٰ محسن نقوی نے کارڈیالوجی او پی ڈی کا بھی تفصیلی معائنہ کیا۔
وزیر اعلیٰ محسن نقوی نے کارڈیالوجی انسٹی ٹیوٹ کے بعد میڈیا سے گفتگو کرتے ہوئے کہاکہ ڈیرہ غازی خان کارڈیالوجی انسٹی ٹیوٹ سے جنوبی پنجاب کے مریض فیض یاب ہورہے ہیں۔
ڈیرہ غازی خان کارڈیالوجی میں بڑے شہروں کے برابر اور بہترین سہولتیں مہیا کرنا چاہتے ہیں۔ ہسپتالوں کو بہتر کرکے مریضوں کے لئے آسانیاں پیدا کرنا چاہتے ہیں۔ سیکرٹری ہیلتھ، سیکرٹری سی این ڈبلیو، کمشنر ڈیرہ غازی خان اور دیگر حکام بھی اس موقع پر موجود تھے۔
بعدازاں وزیراعلیٰ محسن نقوی نے ویٹرنری ہسپتال اور لائیوسٹاک بزنس اینڈ انکوبیشن سینٹر کا دورہ کیا اور الٹرا ساؤنڈ بلاک میں بکری کے الٹراساؤنڈ کے عمل کا مشاہدہ کیا۔وزیراعلیٰ محسن نقوی نے بکری کے مالک سے ادارے میں دستیاب سہولتوں کے بارے میں بھی دریافت کیا۔
وزیراعلیٰ محسن نقوی نے ہسپتال میں موجود رجسٹر او ردیگر ریکارڈ بھی چیک کیا۔وزیراعلیٰ محسن نقوی نے ہدایت کی کہ لائیوسٹاک کی پیداوار 10گنا بڑھانے کے لئے 7روز میں پائیدارحکمت عملی مرتب کی جائے۔
متحدہ عرب امارات اور دیگر ممالک میں لائیوسٹاک کی ڈیمانڈ بڑھ رہی ہے۔ یو اے ای کے حالیہ دورے کے دوران لائیوسٹاک پراڈکٹ کی ایکسپورٹ کے بارے میں مذاکرات حوصلہ افزاء رہے ۔
پنجاب میں لائیوسٹاک کے لئے تمام ممکنہ اقدامات کئے جائیں گے اور بہترین ویکسین ادویات اورانجکشن وغیرہ بھی فراہم کئے جائیں گے۔ صوبائی وزیر ابراہیم مراد نے بریفنگ دی۔صوبائی سیکرٹریز، کمشنر اور دیگر حکام بھی موجود تھے۔
