شہباز شریف کی لائن آف کنٹرول پر قابض بھارتی فوج کی فائرنگ کی شدید مذمت

پاکستان مسلم لیگ(ن) کے صدر اور قائد حزبِ اختلاف شہباز شریف کی لائن آف کنٹرول پر قابض بھارتی فوج کی فائرنگ کی شدید مذمت کی ہے ایک بیان میں انہوں نے کہا کہ بھارت جنگی جنون میں پاگل ہوچکا ہے۔ ایل او سی پر فائرنگ سے بھارت کے مقبوضہ جموں کشمیر میں انسانیت کے خلاف جرائم چھپ نہیں سکتے۔ انہوں نے کہا کہ ایک بھارت نے پورے خطے کے امن و سلامتی کو خطرے میں ڈال رکھا ہے۔ ایل او سی پرجنگ بندی کی باربار خلاف ورزی اور شہری آبادی پر فائرنگ جنوبی ایشیا میں جنگ بھڑکانے کی بھارتی سازش ہے۔ عالمی برادری خاص طور پر اقوام متحدہ کی بھارتی جنگی جنون پر خاموشی عالمی امن سے بے پروائی کے مترادف ہے۔ انہوں نے کہا کہ دنیا تماشا دیکھنے کے بجائے بھارت کو عالمی قانون کی خلاف ورزیوں سے روکنے کا فرض پورا کرے۔ انہوں نے پاک فوج کی جانب سے موثر جواب دینے کا خیر مقدم کیاجب کہ گیارہ سالہ لڑکی اور خاتون سمیت 5 شہریوں کے زخمی ہونے پر افسوس کااظہارکیا۔ انہوں نے متاثرہ خاندانوں سے اظہارِ ہمدردی اور زخمیوں کی جلد صحت یابی کے لیے دعاکی۔