لندن: برطانیہ کی لیبر پارٹی سے تعلق رکھنے والے دارالامرا کےسابق رکن 64 سالہ لارڈ نذیر احمد کو1970 کی دہائی میں دو کم سن بچوں کے جنسی استحصال کے جرم میں 5 سال 6 ماہ قید کی سزا سنادی گئی۔
باغی ٹی وی : برطانوی نشریاتی ادارے "بی بی سی” کے مطابق شیفلڈ کراؤن کورٹ کے جج جسٹس لیونڈر نے پاکستانی نژاد برطانوی سیاستدان کو سزا سنائی پاکستانی نژاد برطانوی سابق پارلیمنٹیرین کو 1970 کی دہائی میں ایک 11 سالہ لڑکے پر جنسی حملے اور ایک کمسن لڑکی کے ریپ کی کوشش کا جرم ثابت ہونے پر سزا سنائی اور دونوں کیسز میں انہیں مجموعی طور پر نصف دہائی سے زائد قید کی سزا سنائی گئی۔
لارڈ نذیر احمد کو جنسی زیادتی کرنے کے جرم میں پانچ سال چھ ماہ قید کی سزا
عدالت نے قرار دیا کہ لارڈ نذیر احمد کی جانب سے 50 سال قبل کیے گئے ان کے فعل سے متاثرین کی شخصیت پر غیرمعمولی اور دیرپا اثرات پڑے ہیں انہیں گہرا صدما پہنچا اور یہ کہ سزا بدلے کے طور پر نہیں بلکہ انصاف کے لیے دی جا رہی ہے۔
عدالت کی جانب سے سزا سنائے جانے کے بعد اب لارڈ نذیر احمد کی قید کی سزا شروع ہوگی سابق برطانوی پارلیمینٹرین کو گزشتہ ماہ 6 جنوری کو عدالت نے بچوں پر جنسی حملوں کا مجرم قرار دیا تھا۔
ٹرائل کے دوران عدالت کو بتایا گیا تھا کہ لارڈ نذیر احمد نے نصف صدی قبل اپنی نوجوانی میں خود سے کم عمر لڑکی اور لڑکے پر حملہ کیا ٹرائل کے دوران لارڈ نذیر احمد نے خود پر لگے الزامات کو مسترد کرتے ہوئے انہیں من گھڑت قرار دیا تھا، تاہم وہاں کے سکیورٹی اداروں کی جانب سے پیش کیے گئے ثبوتوں سے معلوم ہوا تھا کہ تمام الزامات غلط نہیں تھے۔
وزیراعظم بورس جانسن کودھچکا،4 قریبی ساتھی مستعفی
لارڈ نذیر احمد اور ان کے دو بھائیوں پر چند سال قبل بچوں پر جنسی حملوں کے الزامات لگائے گئے تھے، جس کے بعد ان کے خلاف باضابطہ تفتیش شروع کی گئی تھی خود پر الزامات عائد ہونے کے فوری بعد ہی لارڈ نذیر احمد نے الزامات کو مسترد کردیا تھا مگر 2019 میں عدالت نے ان پر بچوں پر جنسی حملوں کی فرد جرم عائد کی تھی۔
عدالت کی جانب سے فرد جرم عائد کیے جانے کے بعد 2020 کے آخر تک لارڈ نذیر احمد نے پارلیمنٹ سے استعفیٰ دے دیا تھا اسی کیس میں لارڈ نذیر احمد کے دونوں بھائیوں کو ٹرائل کے دوران ان فٹ قرار دیا گیا تھا مگر ان کے خلاف ٹرائل چلتا رہا۔
لارڈ نذیر احمد کے خلاف جنوری 2021 میں فیصلہ آنا تھا مگر کورونا کی وبا کے باعث فیصلہ ایک سال کی تاخیر سے گزشتہ ماہ سنایا گیا اور اب انہیں سزا بھی سنادی گئی عدالت کی جانب سے سزا سنائے جانے کے بعد اب لارڈ نذیر احمد کو گرفتاری دینی پڑے گی یا پھر پولیس انہیں مقررہ وقت پر گرفتار کرکے جیل بھیج دے گی۔