ماہرین نے رواں سال شاہی حیثیت سے دستبردار ہونے والے برطانوی شاہی جوڑے پرنس ہیری اور میگھن مارکل کی برطانیہ سے کینیڈا اور پھر وہاں سے امریکی ریاست کیلی فورنیا آمد کے بعد سانتا باربرا کاؤنٹی میں خریدے گئے گھر اور دیگر اخراجات کے حوالے سے سوالات اٹھا ئے ہیں۔
باغی ٹی وی : برطانوی اخبار ڈیلی میل کی ایک رپورٹ کے مطابق سانتا باربرا کے مونٹی سائٹو علاقے میں واقع شاہی جوڑے کا محل نما گھر 14ہزار 563 مربع فٹ کا گھر پانچ اعشاریہ چار ایکڑ کے قطعہ اراضی پر قائم ہے اور اس کی قیمت 4 لاکھ 80 ہزار امریکی ڈالر برائے مارگیج پلان کے مطابق ہے۔
رپورٹ کے مطابق صرف روزمرہ کے اخراجات اس قدر زیادہ ہیں کہ یہ کسی کی بھی جیب پر ایک بوجھ بن سکتے ہیں اور پھر اگر یہ اخراجات کسی مشہور بالخصوص شاہی حیثیت کے حامل افراد کے ہوں تو پھر اندازہ لگایا جاسکتا ہے وہ کس قدر زیادہ ہونگے۔
ایک مالی امور سے متعلق ماہرین کی ٹیم اسمارٹ ایسٹ نے شاہی جوڑے کے ماہانہ بلز کے حوالے سے دعویٰ کیا ہے کہ ان کے یوٹیلیٹی اخراجات ہی تقریباً 24 ہزار امریکی ڈالرز کے مساوی ہیں جبکہ سیکیورٹی اخراجات تو 33 لاکھ ڈالرز تک ہوسکتے ہیں۔
یہ محل نما گھر جسے اس کے اصل مالک نے پانچ سال پہلے ہی سے مختلف سہولتوں سے آراستہ کررکھا تھا، جن میں ایک مکمل اور شاندار لائیبریری، بیوٹی سلون، آفس، بھاپ اور پانی سے غسل کرنے کی جگہ اور جم، گیم روم، تھیٹر، آرکیڈ، شراب ذخیرہ کرنے کی جگہ اور پانچ گاڑیوں کے لیے وسیع گیراج شامل ہے۔
شاہی جوڑے کو ان سہولتوں کے لیے جو اخراجات کرنے پڑرہے ہیں ان کا سالانہ تخمینہ 44 لاکھ امریکی ڈالر لگایا گیا ہے، اسکے علاوہ چار لاکھ اسی ہزار ڈالر ماہانہ مارگیج پلان، 68 ہزار ڈالر سالانہ ٹیکسز اور 3 لاکھ ڈالر اسٹاف کے اخراجات بھی شامل ہیں۔
تاہم ماہرین نے شاہی جوڑے کے ان تمام اخراجات پر سوال اٹھا دیئے ہیں-
واضح رہے کہ میگھن مارکل اور شہزادہ ہیری نے مئی 2018 میں شادی کی تھی اور ان کے ہاں اگلے ہی سال بیٹے کے پیدائش ہوئی بیٹے کی پیدائش کے چند ماہ بعد ہی دونوں نے شاہی حیثیت چھوڑنے کا اعلان کیا تھا اور رواں برس 9 مارچ کو انہوں نے باضابطہ طور پر شاہی حیثیت سے علیحدگی اختیار کی تھی شاہی حیثیت چھوڑنے کے بعد پہلے کینیڈا اور اب امریکی ریاست کیلیفورنیا کی سانتا باربرا کاؤنٹی میں رہائش پذیر ہیں۔جہاں انیوں نے اپنی پروڈکشن کمپنی شروع کی ہے نیٹ فلیکس کے ساتھ کروڑوں ڈالر کا معاہدہ کیا ہے۔
