پیپلز پارٹی جتنی کوشش کرلے میئر کراچی جماعت اسلامی کا ہی ہو گا. حافظ نعیم
امیر جماعت اسلام کراچی حافظ نعیم الرحمان کا کہنا ہے کہ سندھ حکومت کتنی بھی کوشش کر لے کراچی کا میئر جماعت اسلامی کا ہی ہو گا۔کراچی کے علاقے فیڈرل بی ایریا بلاک فائیو میں الخدمت کی جانب سے مستحق خاندانوں میں مفت راشن تقسیم کی تقریب منعقد کی گئی۔
حافظ نعیم الرحمان کا تقریب سے خطاب کرتے ہوئے کہنا تھا کہ پورے ملک میں الخدمت اسپتال ہیں، سیاسی اعتبار سے ہم زیادتی اور ظلم کو سامنے لاتے ہیں اور لاتے رہیں گے، کےالیکٹرک ناجائز لوڈ شیڈنگ کر رہی ہے اور بل ڈبل بھیج دیے ہیں۔ان کا کہنا تھا شناختی کارڈ کے مسئلے کو ہم نے اجاگر کیا اور 80 فیصد لوگوں کا مسئلہ حل ہو گیا، کراچی کو سب نے نظر انداز کیا ہوا ہے۔
انہوں نے مزید کہنا تھا کہ یہ حکومت کتنی بھی کوشش کر لے کراچی کا میئر جماعت اسلامی کا ہو گا، پی پی پی گیارہ یوسیز کے ضمنی انتخابات سے بھاگ رہی ہے، ایم کیو ایم والے ایڈمنسٹر اور 4 وزارتیں پکڑ کر خاموش ہو گئے۔
یاد رہے اس سے قبل بھی حافظ نعیم نے میڈیا سے بات کرتے ہوئے کہا تھا کہ جعل سازی کرکے جماعت اسلامی کے نمبر کم کردیےگئے، پی ٹی آئی بھی وہی کام کر رہی ہے جو پیپلز پارٹی نےکیا، ہم میں تو ظرف ہےکہ ہم پی ٹی آئی کی بھی بات کر رہے ہیں۔
حافظ نعیم الرحمان کا کہنا تھا کہ یہ نمبر تبدیل کرسکتے ہیں، تاخیر کرسکتے ہیں مگر کراچی پیپلز پارٹی کا نہیں، پیپلزپارٹی کو بھی بتایا کہ وہ کراچی نہیں جیت سکتی، کراچی کے عوام سمجھتے تھےکہ اب کراچی کے حالات بہتر ہوں گے، خود کو عوام کا چیمپئن کہنے والے اپنی جماعت میں جمہوری نہیں۔ ان کا کہنا تھا کہ بلدیاتی الیکشن کروانےکے پیچھے صرف جماعت اسلامی تھی، اس وقت الیکشن کمیشن پیپلزپارٹی کی بی ٹیم بنا ہوا ہے۔
