مردان: شاپنگ مال کے عملے سے جھگڑا، 2 ریلوے پولیس کے اہلکار جاں بحق

مردان میں نوشہرہ روڈ پر واقع ایک شاپنگ مال کے عملے اور ریلوے پولیس میں جھگڑا ہوا ہے جس کے دوران فائرنگ بھی ہوئی ہے۔پولیس کے مطابق واقعے میں ریلوے پولیس کے 2اہلکار جاں بحق ہوئے ہیں جبکہ شاپنگ مال کے عملے کے بھی 4 افراد زخمی ہو گئے۔ریلوے کی اراضی پر قائم شاپنگ مال کو حکام نے لیز کے معاملے پر بند کر دیا تھا۔پولیس کے مطابق آج شاپنگ مال دوبارہ کھولنے پر ریلوے پولیس اور شاپنگ مال کے عملے میں جھگڑا ہوا۔پولیس نے بتایا ہے کہ شاپنگ مال کے عملے کا کہنا ہے کہ عدالت سے اسٹے آرڈر لے کر شاپنگ مال کھول دیا تھا۔ایس پی سٹی شفیع الرحمٰن کا کہنا ہے کہ واقعے کی تحقیقات شروع کر دی ہیں۔
ڈی پی او مردان نے واردات میں ملوث عناصر کی گرفتاری کیلئے ایس پی انوسٹی گیشن ارشد خان کی سربراہی میں ایس پی سٹی شفیع الرحمن، ڈی ایس پی اعجاز خان اور متعلقہ ایس ایچ او و تفتیشی افسران پر مشتمل خصوصی ٹیم تشکیل دیا۔ سٹی پولیس نے بروقت کارروائی عمل میں لاتے ہوئے 08 افراد کو حراست میں لیکر مزید ملوث عناصر کی گرفتاریوں کیلئے سرچ اپریشن شروع کردی۔