مرحوم غلام فرید صابری کے بھائی قوال محمود صابری کو پاپوش نگر قبرستان میں سپردخاک کردیا گیا۔
باغی ٹی وی : محمود صابری کی نمازجنازہ گزشتہ روز فرقانیہ مسجد لیاقت آباد نمبر 4 میں بعد نماز مغرب ادا کی گئی، وہ صابری برادران کے سب سے چھوٹے اور چوتھے نمبر کے بھائی تھے،جنھوں نے اپنے بڑے بھائیوں غلام فرید صابری اور مقبول صابری کے ہمراہ ان گنت قوالیاں گائیں-
محمود صابری صابربرادران کے گروپ کا حصہ ہوا کرتے تھے،صابری برادران کی مقبول قوالی تاجدارحرم سمیت انھوں نے اپنے بھائیوں کے ہمراہ فن قوالی کا بارہا مظاہرہ کیا۔
محمود صابری کے بھتیجے اور غلام فرید صابری کے بیٹے طلحہ صابری کے مطابق ان کے چچا محمود صابری کا انتقال حرکت قلب بند ہونے کے سبب ہوا،ان کی عمر 70 سال تھی،طلحہ کے مطابق وہ جرمنی میں مقیم تھے تاہم حالیہ دنوں میں پاکستان آئے ہوئے تھے۔
دوسری جانب غلام فرید صابری کے بیٹے اور محمود صابری کے بھتیجے کی آج پانچویں برسی منائی جا رہی ہے ان کو 22 جون سن 2016ء کو لیاقت آباد میں گھر سے کچھ فاصلے پر انھیں اس وقت دہشت گردوں نے فائرنگ کا نشانہ بنایا جب وہ ایک نجی ٹی وی کے شو میں شرکت کے لیے گھر سے روانہ ہوئے تھے۔ اس قاتلانہ حملے کے نتیجے میں امجد صابری شدید زخمی ہوگئے اور زخموں کی تاب نہ کر جاں بحق ہوگئے تھے۔