اسلام آباد:اللہ تعالیٰ ربیع الاول کےاس دن کی فضلیت،سعادت و برکت سے مسلمانوں کا دل منوراور روشن کر دے:چیئرمین وڈپٹی چیئرمین سینیٹ کا پیغام آگیا ، اطلاعات کے مطابق چیئرمین سینیٹ محمد صادق سنجرانی اور ڈپٹی چیئرمین سینیٹ سینیٹر مرزا محمد آفریدی نے عید میلاد النبیﷺ کے پُرمسرت اور بابرکت موقع پر اپنے علیحدہ علیحدہ پیغامات میں مسلمانانِ عالم اورخصوصاًتمام اہل وطن کو دل کی اتھاہ گہرائیوں سے مبارکباد پیش کی اور دعا کی کہ اللہ تعالیٰ اس دن کی فضلیت،سعادت و برکت سے ہر مسلمان کا دل منوراور روشن کر دے اور وطن عزیز کو اس یومِ مبارک کے فیض و برکات سے مالا مال کر دے۔
خاتم النبین آنحضرت محمد ﷺ صرف مسلمانوں کے لئے ہی نہیں بلکہ بنی نوع انسان اور تمام کائنات کے لئے رحمتہ العالمین بن کر تشریف لائے۔ اس لحاظ سے 12 ربیع ا لا ول کا دن تاریخ ِاسلام کا ہی نہیں بلکہ پوری کائنات اور انسانیت کیلئے عظیم ترین دن کا درجہ رکھتا ہے۔یہ دن انسانیت کو نسلی، علاقائی، طبقاتی، لسانی اور جغرافیائی تعصبات کی دلدل سے نکال کر امن و محبت اور ا تحاد و یگانگت کا درس دیتا ہے۔ اخوت، امن اور خیر کی فضاء قائم کرنے کے لئے اسوہ حسنہ رسول ﷺکی پیروی ناگریز ہے کیونکہ ہماری بقا ء اور دینی و دیناوی کامیابی اسی اسوہ حسنہ کی مکمل پیروی پر منحصر ہے۔
آج اس با سعادت دن کو منانے کا سب سے احسن طریقہ یہ ہے کہ ہم اپنے کردار، گفتار اور عمل سے دنیا کو یہ ثابت کریں کہ ہم رحمتہ العالمین کے اْمتی ہیں اور پیارے پیغمبر ﷺ کی تعلیمات پر عمل کرتے ہوئے اپنے اندر اتحاد واتفاق، باہمی محبت ورواداری، عفوودرگذر اور احساس ذمہ داری جیسے نایاب اوصاف پیدا کریں گے جو ہمارے ملک و قوم کی بقا ء اور پوری دنیا میں ترقی کیلئے راہیں ہموار کرنے میں معاون ثابت ہوں۔ میں اس بابرکت موقع پران تمام شہداء، غازیوں اور مجاہدوں کو بھی خراجِ عقیدت پیش کرنا چاہتا ہوں جنہوں نے وطن عزیز کی حفاظت کے لئے لازوال قربانیاں دیں۔
حضور اکرم ﷺ کی زندگی بنی نوع انسان کیلئے مشعلِ راہ ہے اور دنیا وآخرت کی کامیابی کی ضمانت بھی ہے۔اسلامی تعلیمات پر عمل کرتے ہوئے دنیا بھر میں امن،محبت، ایثار، قربانی اتحاد ویگانگت کا ماحول پیدا کیا جا سکتا ہے۔ہم خدائے بزرگ و برتر کی بارگاہ دعا گو ہوں کہ وہ ہمیں اپنی زندگیاں تعلیمات نبوی ﷺکی روشنی میں گزارنے کی توفیق عطا فرمائے۔
