جوں جوں دوا کی مرض بڑھتا گیا ، یقین دہانی کے باوجود ایم کیوایم کا کراچی بحالی کمیٹی کےاجلاس میں شرکت سے انکار

کراچی:جوں جوں دوا کی مرض بڑھتا گیا ، یقین دہانی کے باوجود ایم کیوایم کا کراچی بحالی کمیٹی کےاجلاس میں شرکت سے انکار،اطلاعات کےمطابق خالد مقبول صدیقی کی طرف سے وزارت سے مستعفی ہونےکے بعد وفاقی کابینہ کے بائیکاٹ کے بعد ایم کیوایم پاکستان نے کراچی بحالی کمیٹی کے اجلاس میں شرکت سے انکار کردیا۔

ذرائع کے مطابق وزیراعظم عمران خان کی جانب سے کراچی کی بحالی و ترقی کے لیے بنائی گئی کمیٹی کے اجلاس میں ایم کیو ایم نے شرکت کرنے سے معذرت کر لی ہے۔بحالی کراچی کمیٹی کا اجلاس پیر کی صبح 10 بجے گورنر ہاؤس میں ہوگا جس کی صدارت وفاقی وزیر ترقی و منصوبہ بندی اسد عمر کریں گے،ایم کیوایم پاکستان کے وسیم اختر(میئر کراچی)، فیصل سبزواری اور کنور نویدکراچی بحالی کمیٹی کے رکن ہیں۔

واضح رہے کہ ڈاکٹر خالد مقبول صدیقی نے احتجاجاً وزارت چھوڑنے کا اعلان کرتے ہوئے کہا تھا کہ میرا اب کابینہ میں بیٹھنا بے سود ہے تاہم حکومت سے تعاون مسلسل جاری رہے گا۔ان کا کہنا تھا کہ ایم کیوایم پاکستان حکومت سے تعاون مسلسل جاری رکھے گی اور حکومت کا حصہ بھی ہوگی، اس کا کراچی کے شہریوں پر اچھا تاثر ہوگا۔