شمالی وزیرستان اور لکی مروت میں پولیو کے دو کیسز سامنے آئے ہیں۔
ملک میں پولیو کے دو مزید کیسز سامنے آگئے ہیں، ایک کیس شمالی وزیرستان اور ایک لکی مروت میں رپورٹ ہوا۔ قومی ادارہ صحت کے مطابق پولیو وائرس سے معذور ہونے والے بچوں میں لکی مروت سے 16 سالہ لڑکا اور شمالی وزیرستان سے دو سالہ بچہ شامل ہیں۔
پاکستان نیشنل پولیو لیبارٹری قومی ادارہ صحت اسلام آباد نے دونوں بچوں میں وائرس کی تصدیق کر دی ہے۔ پاکستان نیشنل پولیو لیبارٹری کے مطابق لکی مروت سے تعلق رکھنے والے 16 سالہ لڑکے کا بایاں پاؤں متاثر ہوا ہے، جب کہ شمالی وزیرستان سے رپورٹ ہونے والا بچہ جسمانی طور پر مکمل متاثر ہوگیا تھا اور بعد میں انتقال کرگیا۔
قومی ادارہ صحت کے اعداد و شمار کے مطابق رواں برس پاکستان سے پولیو کیسز کی تعداد 17 ہوگئی ہے، ان کیسز میں 15 متاثرہ بچوں کا تعلق شمالی وزیرستان سے ہے، اور دو کیسز لکی مروت سے رپورٹ ہوئے ہیں۔
پاکستان میں پولیو کے خاتمے کی جدوجہد
1994 سے پاکستان میں پولیو کے خاتمے کا پروگرام ملک سے پولیو کے مکمل خاتمے کے لئے مصروفِ عمل ہے۔ اس وقت ملک بھر میں 339,521 پولیو ورکرز پولیو کے خاتمے کے ان اقدامات میں ہراول دستے کا کردار ادا کر رہے ہیں۔ اس پروگرام کو دنیا کے سب سے بڑے نگرانی کے نظام کی خدمات حاصل ہیں۔ اس کے علاوہ اس پروگرام کو معلومات کے حصول اور تجزیے کا معیاری نیٹ ورک، جدید ترین لیبارٹریز، وبائی امراض کے بہترین ماہرین اور پاکستان کے علاوہ دنیا بھر میں پبلک ہیلتھ کے نمایاں ماہرین کی خدمات بھی حاصل ہیں۔
