![](https://baaghitv.com/wp-content/uploads/2021/08/WhatsApp-Image-2021-08-14-at-3.03.55-PM.jpeg)
پاکستانی اداکارہ وماڈل نادیہ حسین کورونا سے صحت یاب ہوگئیں۔
باغی ٹی وی : اداکارہ نادیہ حسین میں رواں ماہ 3 اگست کو کورونا کی تشخیص ہوئی تھی، وہ ویکسینیشن کروانے کے باوجود وبا کا شکار ہوئی تھیں کورونا کا شکار ہونے کے بعد انہوں نے خود کو گھر میں قرنطینہ کرلیا تھا اور مداحوں سے صحت یابی کے لیے دعا کی اپیل بھی کی تھی۔
تاہم اب وہ 12 دن میں ہی کورونا سے صحت یاب ہوگئیں، انہوں نے گزشتہ روز 13 اگست کو انسٹاگرام پوسٹ میں بتایا کہ اب وہ بلکل ٹھیک ہیں نادیہ حسین نے کورونا کی منفی ٹیسٹ ٹیسٹ کا اسکرین شاٹ شیئر کرتے ہوئے دعائیں کرنے پر مداحوں کا شکریہ بھی ادا کیا۔
اداکارہ نے سوالوں کے جواب میں بتایا کہ ان میں کورونا کی بڑی علامات ظاہر نہیں ہوئی تھیں اداکارہ نے کمنٹس میں پوچھے گئے سوالوں کے جواب میں بتایا کہ کورونا سے صحت یاب ہونے کے باوجود تاحال ان کے سونگھنے اور چکھنے کی صلاحیت مکمل طور پر بحال نہیں ہوئی-
کچھ مداحوں نے ان سے فرمائش کی کہ وہ ایک ویڈیو کے ذریعے بتائیں کہ انہوں نے کورونا ہونے کے بعد کون سی میڈیسن لیں اور انہیں کن تکالیف اور مسائل کا سامنا رہا جس پر نادیہ حسین نے کہا کہ زیادہ میڈیسن نہیں لیں اور انہیں زیادہ تکالیف کا سامنا بھی نہیں ہوا، اس لیے انہیں ویڈیو بنانے کی ضرورت نہیں۔
علاوہ ازیں اداکارہ ، ماڈل و میک آرٹسٹ نے اپنی پوسٹ میں پاکستانی جھنڈے کے ساتھ تصویر شئیر کرتے ہوئے قوم کو یوم آزادی کی مبارکباد دی-
واضح رہے کہ نادیہ حسین سے قبل عدنان صدیقی اور اشنا شاہ بھی کورونا سے صحت یاب ہوچکے ہیں، وہ بھی دو سے ڈیڑھ ہفتوں میں صحت یاب ہوگئے تھے۔
عدنان صدیقی اور اشنا شاہ بھی ویکسینیشن کروانے کے باوجود کورونا کا شکار ہوئے تھے، تاہم ان میں ویکسینیشن کی وجہ سے بڑی علامات ظاہر نہیں ہوئیں اور انہیں زیادہ تکالیف کا سامنا بھی نہیں کرنا پڑا۔