ڈاکٹرغلام مصطفی بڈانی
ننکانہ صاحب،باغی ٹی وی(نامہ نگاراحسان اللہ ایاز) بھارتی فضائی جارحیت کا سلسلہ جاری ہے، ضلع ننکانہ صاحب کے علاقے دھارووالی گاؤں میں ایک بھارتی ڈرون گر کر تباہ ہو گیا۔ ڈپٹی کمشنر محمد تسلیم اختر راؤ اور قانون نافذ کرنے والے دیگر ادارے فوری طور پر جائے وقوعہ پر پہنچے اور ڈرون کے ملبے اور شواہد کو محفوظ بنانے کے لیے کارروائی شروع کر دی گئی۔
ڈرون کھیتوں میں گرا جس کے باعث کسی جانی نقصان کی اطلاع نہیں ملی۔ ضلعی انتظامیہ اور پولیس کی جانب سے شہریوں سے اپیل کی گئی ہے کہ جائے وقوعہ پر جانے والے راستوں پر رکاوٹیں کھڑی نہ کریں اور اپنی گاڑیاں و موٹرسائیکلیں بھی دور رکھیں تاکہ ریلیف اور تفتیشی سرگرمیوں میں رکاوٹ نہ ہو۔ عوام الناس سے محتاط رویے اور تعاون کی اپیل کی گئی ہے۔
اس واقعے کے پس منظر میں پاک فوج کے شعبۂ تعلقات عامہ (آئی ایس پی آر) کے ترجمان لیفٹیننٹ جنرل احمد شریف چوہدری نے 7 اور 8 مئی کی درمیانی شب بھارتی فضائی جارحیت کی تصدیق کرتے ہوئے بتایا ہے کہ بھارت نے پاکستانی فضائی حدود کی سنگین خلاف ورزی کرتے ہوئے 12 ہیرپ ڈرونز بھیجے، جنہیں پاک فضائیہ نے فوری ردعمل کے ساتھ مار گرایا۔
ترجمان کے مطابق بھارتی ڈرونز کو لاہور، گوجرانوالہ، چکوال، راولپنڈی، اٹک، بہاولپور، میانو، چھور، کراچی اور اب ننکانہ صاحب کے نواح میں نشانہ بنایا گیا۔ اس کارروائی کے دوران لاہور میں پاک فوج کے چار جوان زخمی ہوئے جبکہ میانو میں ایک شہری شہید اور ایک زخمی ہوا۔
آئی ایس پی آر کا کہنا ہے کہ بھارت کا یہ عمل کھلی جارحیت ہے جس کا مؤثر جواب دیا گیا ہے۔ پاکستانی مسلح افواج پوری تیاری کے ساتھ ملک کی فضائی، زمینی اور سمندری سرحدوں کے تحفظ کے لیے چوکس ہیں۔
