اسلام آباد:نوازشریف چارغیرملکی سفارت خانوں سےرابطے میں ہیں،کلام بھارتی اورزبان نوازشریف کی ہے،اطلاعات کے مطابق وفاقی وزیر ہوا بازی غلام سرور خان کا کہنا ہے کہ سابق وزیر اعظم نواز شریف لندن میں4 غیر ملکی سفارت خانوں سے مل کر پاکستان اور پاکستانی اداروں کے خلاف کام کر رہے ہیں ۔
پارٹی دفتر میں پریس کانفرنس کرتے ہوئےغلام سرور خان نے کہا کہ سابق وزیراعظم قومی مجرم ہیں،پاکستان کو بھارت کا غلام بنانا چاہتے ہیں۔نواز شریف کو واپس لانے کے لئے تمام ذرائع استعمال کر کے عوامی اور قانونی عدالت میں پیش کریں گے۔
وفاقی وزیر نے کہا کہ نواز شریف نے اپنی بیماری کی جھوٹی رپورٹس مینج کی ہیں، نواز شریف 3 بار وزیر اعظم بنے 6بار ان کے خاندان کو بڑے صوبہ کی وزارت اعلیٰ ملی۔ پاکستان اس سے زیادہ ان کو اور کیا دیتا؟ مگر یہ پاکستان اور قومی اداروں کے خلاف بہتان تراشی کرتے ہیں۔ دو قومی نظریہ کی دھجیاں بھی اڑائیں،بھارت پاکستان کے ٹکڑے کرنا چاہتا ہے سابق وزیر اعظم بھارت کے ہاتھ کھیل رہے ہیں۔
غلام سرور خان کا مزید کہنا تھا افواج پاکستان کے خلاف نواز شریف،فضل الرحمان کے بیانات قابل مذمت ہیں،شریف فیملی ایشیا کا سب سے بڑا کرپٹ خاندان ہے۔ سابق وزیر اعظم کا سابق صدر غلام اسحاق،فاروق لغاری،جنرل آصف نواز،جنرل وحید کاکڑ،جنرل کرامت،جنرل پرویز مشرف،جنرل راحیل اور جنرل باجوہ سب سے جھگڑے رہے۔ یہ کھاتے پاکستان کا ہیں اور سازش بھی پاکستان کے خلاف کرتے ہیں۔
وفاقی وزیر ہوا بازی غلام سرور خان ںے کہا کہ جنرل مشرف بھی باہر گئے مگر پاکستان کے خلاف کبھی کوئی جملہ نہیں کہا، ایم کیو ایم کے قائد الطاف حسین پاکستان کے خلاف بولا تو انہوں نے اپنے قائد سے لاتعلقی کر لی اور اپنی سیاست شروع کر دی۔ مسلم لیگ ن کے محب وطن کارکن،اراکین اسمبلی بھی اب آگے آئیں۔ بہت سارے اراکین نے اب کھل کر پاکستان مخالف نواز شریف کی سیاست مسترد کردی ہے، نواز شریف نے آج تک کلبھوشن کا نام نہیں لیا نا کسی کو اپنی جماعت میں لینے دیا۔
وفاقی وزیر ہوا بازی غلام سرور خان کامزید کہنا تھا پیپلز پارٹی صرف اندرون سندھ اور مسلم لیگ (ن) جی ٹی روڈ کی جماعت ہے ان سب چلے کارتوسوں سے ہمیں کوئی خطرہ نہیں۔
