تل ابيب:حماس کی طرف سے جنگ بندی کےانکارکے بعد نیتن یاہو نے بھی جنگ بندی کے مطالبے کو مسترد کردیا،اطلاعات کے مطابق اسرائیلی وزیراعظم نیتن یاہو نے عالمی رہنماؤں کے مطالبے کو یکسر مسترد کرتے ہوئے کہا کہ شدت پسندی کے خاتمے تک جنگ جاری رہے گی۔
عالمی خبر رساں ادارے کے مطابق اسرائیل نے آج بھی غزہ پر فضائی بمباری کی جس کے نتیجے میں 4 فلسطینی شہید اور کئی گھر مسمار ہوگئے جب کہ حماس کے راکٹ حملوں میں 5 سالہ لڑکے سمیت 3 اسرائیلی مارے گئے۔
دس دن سے جاری جھڑپوں میں غزہ میں شہادتوں کی مجموعی تعداد 300 سے زائد ہوگئی جب کہ اسرائیل کا کہنا ہے کہ حماس کے حملوں میں 130 اسرائیلی شہری بھی مارے گئے۔
ادھر جارح پسند وزیراعظم نیتن یاہو نے عالمی رہنماؤں کی جنگ بندی کے مطالبے کو مسترد کردیا اور روایتی ہٹ دھرمی کا مظاہرہ کرتے ہوئے کہا کہ اسرائیلی شہریوں پر حملے بند ہونے تک مزاحمت کاروں کے خلاف جنگ جاری رہے گی۔
نیتن یاہو نے ہرزہ سرائی کرتے ہوئے مزید کہا کہ اسلامی شدت پسندوں کو ایسی ضربیں لگائی ہیں جس کی وہ توقع نہیں کر رہے تھے، جب تک اسرائیلی شہریوں پر حملے بند نہیں ہوتے تب تک جنگ جاری رہے گی۔
یاد رہے کہ اس سے پہلے حماس کے رہنما کی طرف سے یہ باقاعدہ اعلان کیا گیا ہےکہ کچھ عالمی طاقتیں ہمیں اسرائیل کے خلاف جنگ بندی پرمجبورکررہی ہیں لیکن ان پرواضح کردیا ہے کہ یہود کےخاتمے تک جنگ جاری رہے گی
اس بیان کے بعد نیتن یاہو نے بھی جنگ بندی سے انکارکرتے ہوئے جنگ جاری رکھنے کا اعلان کیا ہے
