ننکانہ صاحب(باغی ٹی وی نامہ نگاراحسان اللہ ایاز) وزیر اعلیٰ پنجاب اور آئی جی پنجاب کے ویژن کے مطابق انصاف کی فراہمی کو شہریوں کی دہلیز پر پہنچانے کا سفر تیزی سے جاری ہے۔ اس سلسلے میں ڈی پی او سید ندیم عباس نے مرکزی مسجد جامعہ رضوی سانگلہ ہل میں ایک کھلی کچہری کا انعقاد کیا۔
کھلی کچہری کے دوران، ڈی پی او سید ندیم عباس نے شہریوں کے مسائل سنے اور موقع پر ہی فوری حل کے احکامات جاری کیے۔ انہوں نے بتایا کہ سانگلہ ہل آنے کا مقصد ماہ ربیع الاول کی محافل اور جلوسوں کو پر امن بنانا ہے اور اس ضمن میں ضلعی پولیس کی طرف سے بہترین سیکیورٹی اقدامات کیے جائیں گے۔
ڈی پی او نے کہا کہ ماہ ربیع الاول عالم اسلام کے لیے رحمتوں، برکتوں اور فضیلتوں والا مہینہ ہے، اور ہم سب نے مل کر اسے انتہائی ادب و احترام، جوش و جذبے اور منظم طریقے سے منانا ہے۔ ضلعی پولیس تمام محافل، ریلیوں اور دیگر عبادتی پروگرامز کے دوران شہریوں کو مکمل تحفظ فراہم کرے گی۔
ڈی پی او نے یقین دہانی کروائی کہ تمام شہریوں کے کاروبار اور جان و مال کے تحفظ کو یقینی بنایا جائے گا۔ انہوں نے جرائم پر قابو پانے کے لیے تاجر برادری کو CCTV کیمرہ جات نصب کروانے کی ہدایت دی۔ ساتھ ہی، انہوں نے ٹریفک کے مسائل اور دیگر اعتراضات کے فوری حل کی بھی یقین دہانی کروائی۔
کھلی کچہری کے بعد، ڈی پی او نے میلاد کمیٹی کے ہمراہ جشن عید میلاد النبیؐ کے مرکزی جلوس کے روٹ کا جائزہ لیا اور سیکیورٹی انتظامات کو مزید بہتر بنانے کے لیے احکامات جاری کیے۔
اجلاس میں پولیس افسران، تاجر برادری، میڈیا اور سول سوسائٹی نے بھرپور شرکت کی، جس سے شہری مسائل کے حل اور امن و امان کی صورتحال کو بہتر بنانے کے لیے ایک مثبت پیغام گیا۔
