انٹر بینک میں روپے کے مقابلے میں امریکی ڈالر ایک مرتبہ پھر مہنگا ہو گیا جبکہ پاکستان سٹاک مارکیٹ میں زبردست تیزی کی واپسی ہوئی ہے۔
اسٹیٹ بینک آف پاکستان کی سماجی رابطے کی ویب سائٹ ٹویٹر پر جاری کردہ اعداد و شمار کے مطابق انٹر بینک میں رواں ہفتے کے چوتھے کاروباری روز کے دوران انٹر بینک میں روپے کے مقابلے میں امریکی ڈالر کی قیمت میں مزید 9 پیسے کا اضافہ دیکھا گیا۔
اعداد و شمار کے مطابق انٹر بینک میں روپے کے مقابلے میں امریکی ڈالر کی قیمت 201 روپے 92 پیسے سے بڑھ کر 202 روپے 1 پیسے ہو گئی ہے۔ نئی حکومت میں انٹربینک میں ڈالر 19 روپے 8 پیسے مہنگا ہوا۔
دوسری طرف اوپن مارکیٹ میں ڈالر 50 پیسے مہنگا ہوا اور قیمت 203 روپے 50 پیسے پر پہنچ گیا ہے۔ مسلم لیگ ن کی حکومت میں اوپن مارکیٹ میں ڈالر 18 روپے 50 پیسے مہنگا ہوا۔
Interbank closing #ExchangeRate for todayhttps://t.co/OX1iMNpVcS pic.twitter.com/6zIsY5CCas
— SBP (@StateBank_Pak) May 26, 2022
دوسری طرف پاکستان سٹاک مارکیٹ میں زبردست تیزی کی واپسی ہوئی ہے، 100 انڈیکس 529.05 پوائنٹس بڑھ کر 42541.71 پوائنٹس کی سطح پر پہنچ کر بند ہوا۔ پورے کاروباری روز کے دوران کاروبار میں 1.26 فیصد کی بہتری دیکھی گئی جبکہ 13 کروڑ 36 لاکھ 82 ہزار 399 شیئرز کا لین دین ہوا۔
پاکستان میں آج سونے کی فی تولہ قیمت میں 100 روپے کا اضافہ ہوا ہے۔ سندھ صرافہ بازار جیولرز ایسوسی ایشن کے مطابق اس اضافے کے بعد ایک تولہ سونے کی قیمت میں ایک لاکھ 43 ہزار 300 روپے ہوگئی۔اسی طرح 10 گرام سونے کی قیمت 85 روپے بڑھ کر ایک لاکھ 22 ہزار 856 روپے ہے۔ایسوسی ایشن کے مطابق عالمی صرافہ میں سونے کی قدر 6 ڈالر کم ہو کر 1846 ڈالر فی اونس ہے۔
