اسلام آباد:ہمارا مشن تعلیمی اداروں سے منشیات کا خاتمہ کرنا ہے، ان خیالات کا اظہارکرتے ہوئے وفاقی وزیر نارکوٹکس شاہ زین بگٹی نے کہا ہے کہ ہمارا مشن تعلیمی اداروں سے منشیات کا خاتمہ کرنا ہے۔ان کا کہنا تھاکہ اس سلسلے میں تمام ترحفاظتی اقدامات کیئے جارہےہیں
پاکستان کے تعلیمی اداروں میں اس حوالے سے پائی جانے والی تشویش کے بارے میں گفتگوکرتےہوئےوفاقی وزیر نارکوٹکس شاہ زین بگٹی نے میڈیا سے گفتگو کرتے ہوئے کہا کہ نوجوانوں کی بڑی تعداد نشے کی عادی بن چکی ہے، اگر انہیں نشے سے نہیں روکا گیا تو تباہی ہو گی جس کے لیے محکمہ اینٹی نارکوٹکس فورس کام کر رہا ہے۔
اسلام آباد میں وفاقی وزیرنارکوٹکس شاہ زین بگٹی نے کہا کہ نارکوٹکس فورس میں اہلکاروں کی کمی ہے، محکمے میں خالی اسامیوں کو پُر کیا جائے گا۔
ان کا کہنا تھا کہ عمران خان کی حکومت سے پہلے سیاست میں اختلاف ہوتا تھا، عمران خان نے روایات کا خاتمہ کر دیا، خان نے سوائے الزام تراشی کے ملک کے لیے کچھ نہیں کیا، کوئی عمران خان سے پوچھے انہوں نے کون سے اسپتال یا تعلیمی ادارے بنائے؟ آج جو مسئلے ہیں یہ سب عمران خان کے اقدامات کا نتیجہ ہے، پاکستان بننے سے لے کر جتنا قرضہ لیا گیا تھا اتنا عمران خان نے تین سال میں لیا۔
انہوں نے کہا کہ ملک میں مہنگائی کی وجہ عالمی صورتحال بھی ہے، ملک میں زرعی پانی کی قلت قدرتی تھی جس کی وجہ سے زراعت کا بڑا نقصان ہوا ہے، ہم سابقہ حکمرانوں کی طرح چور ڈاکو امپورٹڈ کے نعرے نہیں لگائیں گے بلکہ ہماری حکومت کی کوشش ہے کہ حالات کو بہتر کریں اور ہمارا مشن ہے کہ تعلیمی اداروں سے منشیات کا خاتمہ کریں کیونکہ اس ہی طرح ہمارا مستقبل محفوظ ہو گا۔
وفاقی وزیر نے کہا کہ منشیات کا خاتمہ نہ ہونے کی وجہ منشیات فروش کو سزا نہ ہونا بھی ہے، سینیٹ میں بل پاس کرانے کی بات ہوئی ہے کہ سزا کو سخت کیا جائے۔
