اسلام آباد:پاکستان اور سعودی عرب ایک دوسرے کی فلمیں اور ڈرامے اردو اور عربی زبان میں ڈب کر کے چلائیں گے۔معاہدہ ہوگیا ،اطلاعات کے مطابق پاکستان اورسعودی عرب کے درمیان دونوں ملکوں کے ثقافتی پروگراموں اوردیگراہم معاملات پرایک معاہدہ ہوا ہے جس کے مطابق دونوں ملک ایک دوسرے کی فلموںکوڈبنگ کرکے اپنے اپنے ممالک میں چلائیں گے ،
ذرائع کے مطابق اس سے قبل پاکستان تحریک انصاف کے رہنما سینیٹر فیصل جاوید خان کی،پاکستان میں سعودی سفیر نواف بن سعید المالکی کی دعوت پرسعودی سفارتخانے میں ملاقات ہوئی۔
ملاقات میں دونوں ممالک کے باہمی دلچسپی کے امور پر گفتگو کی گئی۔اس موقع پر طے کیا گیا کہ دونوں ممالک کے عوام کو ایک دوسرے کے مزید قریب لانے کے لئے دونوں ممالک کے کلچر اور ثقافت سے عوام کو روشناس کروایا جائے گا۔
اس مقصد کے لئے سعودی عرب میں اسلامی تاریخ اور سعودی کلچر پر بننے والی فلموں اور ڈراموں کو اردوزبان میں ڈبنگ کر کے پاکستانی میڈیاپر چلایا جائے گا۔اسی طرح پاکستان میں بننے والی فلموں اور ڈراموں کو عربی زبان میں ڈب کرکے سعودی عرب کے میڈیا پر چلایا جائے گا۔
اس موقع پر سینیٹر فیصل جاوید خان کا کہنا تھا کہ اس اقدام سے دونوں برادرممالک کے عوام کو ایک دوسرے کے کلچر اور ثقافت سے آگاہی حاصل ہوگی – نوجوانوں کو اسلامی تاریخ سے روشناس کروایا جائے گا. جس کے نتیجے میں وہ ایک دوسرے کے مزید قریب آسکیں گے۔
سعودی سفیر نواف بن سعید المالکی نے کہا ہے کہ پاکستان اسلامی دنیا کے صف اول کے ممالک میں شامل اور اتحادِ امہ کا زبردست داعی ہے، ملاقات میں نواف بن سعید المالکی نے کہا کہ انہوں نے پاکستان کو انتہائی خوبصورت اور شاندار ملک پایا۔
سعودی سفیر نواف بن سعید المالکی نے اس بات کوتسلیم کیا کہ سیاحت کے شعبے میں ترقی کے لئے پاکستان کا خوبصورت چہرہ دنیا کے سامنے اجاگر کیاجانا چاہیے ۔ ان کا کہنا تھا کہ وزیراعظم عمران خان عظیم لیڈر ہیں جنکی دنیا عزت کرتی ہے ۔
سعودی سفیر نواف بن سعید المالکی نے کہا کہ عالم اسلام بالخصوص سعودی عرب وزیراعظم عمران خان کی خدمات اور ویژن کو پوری اسلامی دنیا خصوصاً سعودی عرب میں قدر و منزلت کی نگاہ سے دیکھا جاتا ہے، اس موقع پر سینیٹر فیصل جاوید خان نے سعودی سفیر کو پاکستان میں سیاحت کے موضوع پر لکھی گئی ایک کتاب بھی پیش کی۔
Leave a reply
