پاکستان اور سعودی عرب کی قیادت کے درمیان دو طرفہ اقتصادی تعاون میں اضافے پر اتفاق

وزیراعظم پاکستان شہباز شریف اور سعودی ولی عہد شہزادہ محمد بن سلمان کے درمیان دو طرفہ ملاقات کا انعقاد ریاض میں فیوچر انویسٹمنٹ انیشیٹو فورم کے 8ویں ایڈیشن کے دوران ہوا، جس میں دونوں رہنماؤں نے اقتصادی شراکت داری کو مزید مستحکم کرنے کے عزم کا اظہار کیا۔ملاقات کے دوران وزیراعظم شہباز شریف نے خادم حرمین شریفین، شاہ سلمان بن عبدالعزیز کے لیے نیک خواہشات کا اظہار کیا اور ان کی صحت و تندرستی کی دعا کی۔ انہوں نے سعودی ولی عہد کا شکریہ ادا کیا کہ سعودی عرب نے بین الاقوامی مالیاتی اداروں کے معاملات میں پاکستان کی حمایت کی ہے۔ شہباز شریف نے سعودی عرب کی حکومت کی طرف سے اپنے وفد کی پرتپاک مہمان نوازی پر بھی شکریہ ادا کیا۔ انہوں نے کہا کہ سعودی ولی عہد کی دور اندیش قیادت نے پاکستان کے کلیدی پالیسی مقاصد سے ہم آہنگ سعودی وژن 2030 کو ترقی کی راہ پر گامزن کرنے میں اہم کردار ادا کیا ہے۔
دونوں رہنماؤں نے پاکستان اور سعودی عرب کے درمیان مضبوط اقتصادی شراکت داری پر زور دیا، جس کے تحت تجارت، سرمایہ کاری اور اقتصادی تعاون کے مختلف شعبوں میں دوطرفہ تعاون کو مزید بڑھانے پر اتفاق کیا گیا۔ وزیراعظم نے سعودی وزیر سرمایہ کاری کی قیادت میں حالیہ دورے کا ذکر کیا، جس میں مختلف مفاہمت کی یادداشتوں (ایم او یوز) پر دستخط کیے گئے تھے، جن کے ذریعے پاک سعودی معاشی تعلقات کو مزید مستحکم کیا جا سکتا ہے۔اعلامیے کے مطابق، دونوں رہنماؤں نے خطے میں جاری اسرائیلی جارحیت پر بھی تشویش کا اظہار کیا، جس کے نتیجے میں بے پناہ تباہی ہوئی ہے۔ اس معاملے پر دونوں رہنما نے انسانی حقوق کے تحفظ کی اہمیت پر زور دیا اور امن کے قیام کے لیے مشترکہ کوششوں کی ضرورت پر اتفاق کیا۔اس ملاقات کے نتیجے میں پاکستان اور سعودی عرب کے درمیان دوطرفہ تعلقات میں مزید گہرائی اور وسعت کی توقع کی جا رہی ہے، جو دونوں ممالک کے عوام کی فلاح و بہبود کے لیے فائدہ مند ثابت ہوگی۔